БлэкIыгъэ тхьаумафэм, гъэтхапэм и 27-м, жьыбгъэшхоу щыIагъэм элек­тричествэм икIуапIэхэр ыгъэфыкъуагъэх, унашъхьэхэр тыритхъыгъэх.

ГумэкIыгъоу ащ къыздихьыгъэхэм ядэгъэзыжьын щытегущыIагъэх АР-м и Премьер-министрэ иIэнатIэ зыгъэцакIэрэ КIэрэщэ Анзаур тхьамэтагъор зыщызэрихьэгъэ зэхэсыгъоу министрэхэм я Кабинет иIагъэм. АР-м гражданскэ оборонэмкIэ ыкIи ошIэ-дэмышIэ IофхэмкIэ и Комитет ипащэу Вячеслав Лотаковым къызэри­IуагъэмкIэ, анахьыбэу жьыб­гъэм зэрар къызфихьыгъэр къалэу Мыекъуапэ, Мыекъопэ, Джэджэ, Кощхьэблэ ыкIи Красногвар­дейскэ районхэр ары.

ГущыIэм пае, Джэджэ районымкIэ культурэм и Унэу П. Х. Афанасовым ыцIэ зыхьырэм ышъхьэ тыритхъыгъ, станицэу Келермесскэм дэт кIэлэцIыкIу IыгъыпIэм, гурыт еджапIэм ыкIи культурэм и Унэ ашъхьэхэр ыгъэфыкъуагъэх. Джащ фэдэу Мыекъуапэ игимназиеу N 5-м, кIэлэцIыкIу IыгъыпIэу N 20-м яунашъхьэхэр тыритхъыгъэх. Гимназием иунашъхьэ ашIы­жьы­фэкIэ ащ чIэс кIэлэеджакIохэр пэIудзыгъэ шIыкIэм тетэу еджэщтых. Ахэм ямызакъоу, Мые­къуапэ инэмыкI псэолъабэми яунашъхьэхэр ыгъэфыкъуагъэх.

Зэрарэу жьыбгъэм къыхьыгъэр зыфэдизыр мы мафэхэм къалъытэ, ащ дакIоуи ыгъэфыкъуагъэхэр зэтырагъэуцожьых.

КIэрэщэ Анзаур пстэури къы­зэфихьысыжьзэ, мы тхьамафэм ыкIэм нэс жьыбгъэм ыкъута­гъэр зэкIэ ашIыжьынэу АР-м и ЛIы­шъхьэу КъумпIыл Мурат пшъэ­рылъ къызэригъэуцугъэр къы­Iуагъ. Муниципальнэ образованиехэм адеIэнэу республикэр хьазыр, ищыкIагъэ хъумэ, ахъщэ IэпыIэгъуи афатIупщыщт.

Жьыбгъэм электричест­вэм икIуапIэу зэпитхъыгъэри бэ. «Рос­сети Кубань» къызэритыгъэмкIэ, а мафэм бригади 109-мэ, нэ­бгырэ 330-мэ, техни­кэ зэфэшъхьафэу 111-мэ Iоф ашIагъ. УФ-м энергетикэмкIэ и Ми­нистерствэ къызэритыгъэмкIэ, гъэтхапэм и 28-рэ пчэды­жьым нэс Краснодар краими Адыгеи­ми электричествэм икIуа­пIэхэр ащызэтырагъэуцожьы­гъэх.