Кризисым пэшIуекIорэ Iофтхьабзэхэр
АР-м и ЛIышъхьэу КъумпIыл Мурат оперативнэ штабым зэхэсыгъоу иIагъэм тхьамэтагъор щызэрихьагъ.
Экономикэм изытет, кризисым пэшIуекIорэ Iофтхьабзэхэм япхырыщын зэхэсыгъом щатегущыIагъэх.
Экономикэм IэпыIэгъу етыгъэныр УФ-м и Президентэу Владимир Путиным пшъэрылъ шъхьаIэу къыгъэуцухэрэм зэращыщыр АР-м и ЛIышъхьэ къыкIигъэтхъыгъ. Ар гъэцэкIэгъэным пае IофшIэпIэ чIыпIэхэр нахьыбэ шIыгъэнхэр, предпринимательхэм IэпыIэгъу афэхъугъэныр, чIыпIэ къин иуцуагъэхэм адеIэгъэныр федеральнэ гупчэм игъоу елъытэ. Тишъолъыр пштэмэ, бизнесым IэпыIэгъу етыгъэныр анахь шъхьаIэхэм ащыщ. ГущыIэм пае, АР-м предпринимательствэм IэпыIэгъу фэхъугъэнымкIэ и Гупчэ бизнес цIыкIум ыкIи гурытым апылъхэм чIыфэ ареты.
Мэкъумэщ хъызмэтым Адыгеим иэкономикэ чIыпIэ ин щеубыты. Ащ фэшI чIыгулэжьыным IэпыIэгъу егъэгъотыгъэнымкIэ УФ-м и Правительствэ амалэу къытырэр зэкIэ гъэфедэгъэнэу АР-м и ЛIышъхьэ пшъэрылъ къафишIыгъ. Мэкъумэщ техникэм икъэщэфынкIэ фэгъэкIотэнхэр зиIэ чIыфэхэр аратыщтых, мэкъумэщ потребительскэ кооперативхэм субсидиехэмкIэ, езыгъэжьэгъэкIэ фермерхэм грантхэмкIэ адеIэщтых.
— Шъолъырхэм IэпыIэгъу афэхъугъэным фэгъэхьыгъэ унашъохэр къэралыгъом ипащэ зэриштагъэхэр лъэшэу тигуап. Экономикэм, социальнэ лъэныкъом псынкIэу Iофтхьабзэхэр ащызетхьанхэмкIэ ахэм яшIуагъэ къэкIощт, — къыкIигъэтхъыгъ КъумпIыл Мурат.