ЦIыфым ищыIэныгъэкIэ анахь ищыкIэгъэ Iэзэгъу уцхэр зэпыугъо фэмыхъоу аIэкIэгъэхьэгъэнхэм ыкIи ауасэ къызэтеIэжэгъэным АР-м и ЛIышъхьэрэ депутатхэмрэ лъэплъэх.

Адыгеим и Прокуратурэ Росздравнадзорыр игъусэу зэпымыоу Iэзэгъу уцхэм ауасэ еуплъэкIу, мы IофшIэным къыхэ­лажьэх монополием пэшIуекIорэ федеральнэ къулыкъур ыкIи Народнэ фронтым ишъолъыр къутамэ. Специалистхэм къызэраIуагъэмкIэ, ахэм анэмыкIэу уасэхэр зэрэзэхъокIырэм псын­кIэу узэрэлъыплъэщт хэушъхьафыкIыгъэ системэм (МДЛП-м) Iоф ешIэ.

ПшъэдэкIыжь зыхьырэ ведомствэхэм къызэраIорэмкIэ, аптечнэ организациехэм хэукъоныгъэхэр ащагъэунэфыгъэп, ау ащ дакIоу Iэзэгъу уцхэм ауасэ зэрэхэхъуагъэр къыхагъэщыгъ.

— Тишъолъыр ит аптечнэ организацие 227-м анэмыкIэу, республикэм ифельдшер-ма­мыку пунктхэм Iэзэгъу уцхэр ащэнхэмкIэ лицензие яI, — къыщаIуагъ АР-м и Къэралыгъо Совет — Хасэм.

Адыгэ Республикэм псауныгъэр къэухъумэгъэнымкIэ и Министерствэ къызэритыгъэмкIэ, медицинэ организациехэм ыкIи фэгъэкIотэн зиIэ цIыф купхэм Iэзэгъу уцхэр аIэкIэгъэ­хьэгъэнхэмкIэ къэралыгъо гарантиехэм яшъолъыр программэ игъэцэкIэн бюджет зэфэшъхьафхэм къахэхыгъэ сомэ миллиард 1,2-рэ блэкIыгъэ илъэсым пэIуагъэхьагъ, 2020-рэ илъэсым ебгъапшэмэ, ар сомэ миллион 250,5-кIэ е процент 24,7-кIэ нахьыб.

2021-рэ илъэсым Адыгэ Рес­публикэм щыпсэурэ нэбгырэ 37422-мэ ыпкIэ зыхэмылъ Iэзэгъу уцхэр аратыгъэх.