Хьалыгъум ыкIи хьаджыгъэм хэшIыкIыгъэ гъомылапхъэхэм якъыдэгъэкIын пылъ хъызмэтшIапIэхэм IэпыIэгъу ятыгъэным пае бюджетым къыдыхэлъытэгъэ ахъщэ тедзэр шъолъырхэм зэратырагощэщтыр УФ-м и Правительствэ ыгъэнэфагъ. Ащ щыщэу Адыгеим сомэ миллиони 2-рэ мин 963,1-рэ къыфэкIощт.

АР-м мэкъу-мэщымкIэ и Министерствэ къызэритыгъэмкIэ, хьалыгъу зыгъэжъэрэ хъызмэтшIапIэхэм япродукцие игъэхьазырын ыкIи иIугъэкIын тырагъэкIуадэрэм щыщ ахъщэ IэпыIэгъу аратыжьыщт.

АР-м и ЛIышъхьэ социальнэ мэхьанэ зиIэ продукцием, мыщ дэжьым хьалыгъум, икъыдэгъэкIын пылъхэм ащ фэдэ IэпыIэгъу ятыгъэным мэхьанэшхо зэри­Iэр, хьаджыгъэм хэшIыкIыгъэ гъомылапхъэхэм ауасэ дэмыкIоеным ар фэIорышIэнэу зэрэгугъэхэрэр къыкIигъэт­хъыгъ.

— Республикэм имэкъумэщ хъыз­мэт IэпыIэгъу етыгъэным, къоджэ псэупIэхэм хэхъоны­гъэхэр ашIынхэм илъэс къэс мымакIэу мылъку апэIутэ­гъахьэ. Iофтхьабзэу ыпэкIэ дгъэнэфагъэхэм япхырыщын лъыдгъэкIотэщт, кризисым пэшIуекIоу шIэгъэн фаехэри дгъэнэфэщтых, — къыIуагъ КъумпIыл Мурат.

УФ-м и Къэралыгъо Думэ Адыгеим ыцIэкIэ щыIэ депутатэу Владислав Резник къызэриIуагъэмкIэ, мэкъумэщ хъыз­мэтым IэпыIэгъу етыгъэным фытегъэ­псыхьэгъэ нэмыкI Iофтхьабзэхэми пар­ламент комиссиемрэ Правительствэмрэ Iоф адашIэщт. Политическэ партиеу «Единэ Россием» мы мафэхэм предложение зэфэшъхьафыбэ егъэхьазыры.

— Республикэм ипащэхэр тигъусэхэу, «Единэ Россиер» къыд­деIэзэ, федеральнэ бюджетым къыхэхыгъэ ахъщэ Адыгеим имэкъумэщ отраслэ джыри къыфэкIоным тыдэлэжьэщт, — къыIуагъ Владислав Резник.