Терроризмэм пэшIуекIогъэнымкIэ Комиссиеу Теуцожь районым щызэхэщагъэм зэхэсыгъо иIагъ. Республикэ хабзэм, хэбзэухъумакIохэм, общественнэ ыкIи динлэжь зэхахьэхэм ялIыкIохэр ащ хэлэжьагъэх.

Терроризмэм зимыушъомбгъунымкIэ шIэгъэн фаехэм, цIыфхэм ар амыштэнымкIэ хабзэм, хэбзэухъумакIохэм, общественнэ ыкIи динлэжь зэхахьэхэм ялIыкIохэм язэдэлэжьэныгъэ зэрагъэпсын фаем ахэр атегущыIагъэх. Iофтхьабзэр зэдэгущыIэ шъуашэм илъэу рекIокIыгъ, тэрэзэу ылъытэрэ екIолIакIэхэр шъхьадж къыриIотыкIынэу амал иIагъ.

Муниципальнэ гъэпсыкIэ зиIэ Теуцожь районым ипащэу Хьачмамыкъо Азэмат зэхэсыгъор къызэIуихыгъ. Ащ къызэриIуа­гъэмкIэ, терроризмэмрэ ащ инэшанэ­хэмрэ районыр ащыухъумэгъэныр анахь лъэныкъо шъхьаIэу зыдэлажьэхэрэм ащыщ, сыда пIомэ районым лъэпкъ зэфэшъхьафхэм ялIыкIохэр зэрэщыпсэухэрэм имызакъоу, лэжьакIо къихьэрэри бэ. НахьыбэрэмкIэ ахэр Гупчэ Азием къекIых. Арышъ, зэгурымыIоныгъэр иуб­лэгъум къагъэуцуным гъунэ лъафы, сыда пIомэ нэбгыритIум язэмызэгъыныгъэ лъэпкъитIур зэпигъэуцун ылъэкIыщт, тер­роризмэмрэ экстремизмэмрэ зыщау­шъомбгъунымкIэ чIыпIэшIу хъушъущт. Аужырэхэр непэрэ мафэм игумэкIыгъо шъхьаIэхэм ащыщых. Терроризмэм ищынагъо мафэ къэс къытшъхьащыт. Джырэ мафэхэм анахьэу ащ ылъапсэхэр зыщидзхэрэр дунэе хъытыур ары.

— Терроризмэм земыгъэушъомбгъугъэнымкIэ Урысые форумэу щыIагъэм къызэрэщаIуагъэмкIэ, экстремизмэм ишапхъэхэр къизыIотыкIырэ сайт минипшIым нахьыбэр дунэе хъытыум щылажьэхэу агъэунэфыгъ. Ахэм гъэбылъыгъэу Iоф ашIэ, ныбжьы­кIэхэр зыхащэх. Гукъау нахь мышIэми, тишъолъыр щыщхэри ахэм ахэтых. Джырэ уахътэм республикэм инэбгырэ 24-р террористическэ зэхахьэхэу Иракрэ Сириемрэ ащыIэхэм ахэтых. Ахэм алъэныкъокIэ уголовнэ Iофхэр Урысыем къыщызэIуахыгъэх, — къы­Iуагъ лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ АР-м икомитет итхьаматэу Шъхьэлэхъо Аскэр. Динлэжь зэхахьэхэм ялIыкIохэм къызэраIуагъэмкIэ, терроризмэм пэшIуекIогъэнымкIэ зэдэгущыIэныр зы амалышIу. АР-м ыкIи Пшызэ шъолъыр ямуфтий игуадзэу Хъущт Азэмат къызэрэхигъэщыгъэмкIэ, ащ елъытыгъэу яIофшIэн агъэлъэшыщт. Ислъам диным ишапхъэхэр тэрэзэу, икъоу цIыфхэм анэзыгъэсыщт хъутбэхэр зэхащэщтых, зылъыIэсхэрэр нахьыбэ ашIыным пае бэрэскэшхо нэмазхэм атырагъафэхэзэ ашIыщт.

— Мы лъэныкъомкIэ тиIофшIэн дгъэлъэшмэ ишIогъэшхо къэкIонэу сэлъытэ. Бэрэскэшхорэ Мыекъопэ мэщытым нэбгырэ миным нахьыбэ къекIуалIэ. Ахэм апашъхьэ уитэу, уалъэгъузэ уадэгущыIэмэ, гущыIэр нахь анэсыщт. Студентхэми, нэмыкI ныбжьыкIэхэми тадэгущыIэщт. Сыдэу щытми, сыдигъуи гущыIэр лъэшы, — еIо Хъущт Азэмат.

Ау а пстэури зэшIохыгъэным фэшI хабзэм, хэбзэухъумакIохэм, общественэ ыкIи динлэжь зэхахьэхэм ялIыкIохэм язэдэлэжьэныгъэ агъэпытэн, лъэпкъ зэ­фэшъхьафэу республикэм щыпсэухэрэм язэгурыIоныгъэ амыукъоу Iоф ашIэн фае. АщкIэ нахьыжъхэр IэпыIэгъушхох, упчIэ­жьэгъух, ау терроризмэм пэшIуекIогъэнымкIэ IофшIэнхэм ныбжьыкIэхэри нахьыбэу ахэщэгъэнхэ фаеу зэхэсыгъом хэлэжьагъэхэм къыхагъэщыгъ.

— Ащ фэдэ ныбжьыкIэхэр тиIэх ыкIи тадэлажьэ. Ахэр цIыкIу-цIыкIоу тиIофшIэн къыхэтэщэх. Ежь ныбжьыкIэр илэгъухэм нахь гущыIэгъу афэ­хъущт. Тэ тиекIолIакIэхэр ащ нэдгъэсзэ, ежьыри ешIушIэзэ терроризмэм, эк­стремизмэм яягъэ зынэсырэр икъоу агурыдгъэIон тлъэкIыщт, — къыддэгощагъ ишIошIхэмкIэ ермэлхэм я Урысые зэхахьэ икъутамэу Адыгеим щыIэм ипащэу Оник Нигоевыр.

Зэхэсыгъор шIуагъэ хэлъэу рекIо­кIыгъ. Зыдэлэжьэнхэ ыкIи нахь куоу Iоф зыдашIэнхэ фэе лъэныкъохэр агъэнэфа­гъэх. ТапэкIи фэдэ Iэнэ хъураехэм яIофшIэн лъагъэкIотэщт, район пстэуми зэхахьэхэр ащызэхащэщтых.

Анцокъо Ирин.