Апэрэ классым щеджэхэрэм зафагъэзагъ
КIэлэцIыкIухэм языгъэпсэфыгъо уахътэ зыщырагъэжьэщтым ипэгъокIэу гъогурыкIоным ишапхъэхэр апэрэ классым щеджэхэрэм агу къагъэкIыжьыгъэх.
ГъогурыкIоным иныбжьыкIэ инспекторхэу апшъэрэ классхэм арысхэм апэрэ классхэм ащеджэхэрэм зафагъэзагъ ыкIи гъогур тэрэзэу зэрэзэпачыщтым епхыгъэ «щынэгъончъэ такъикъ» афызэхащагъ. Ар анахьэу зыфэгъэхьыгъагъэр гъогурыкIоным ишапхъэхэр зэрэбгъэцэкIэнхэ фаем мэхьанэ зэриIэр ары. Джащ фэдэу анаIэ зытырарагъэдзагъэхэм ащыщ къэуцупIэм щыт автомобилым лъэсрыкIор къыкъокIэу гъогум техьэ зэрэмыхъущтыр.
КIэлэеджакIохэм агу къагъэкIыжьыгъ мэзэхэ уахътэм е ом изытет къызызэIыхьэкIэ нэфынэр къэзытырэ пкъыгъохэм щынэгъончъагъэмкIэ мэхьанэ зэряIэр, ахэр агъэфедэнхэу зэрэщытыр.
ГъогурыкIоным ишапхъэхэу агу къагъэкIыжьыгъэхэр нахь агурыIонхэм фэшI «Шагающий автобус» зыфиIорэм фэдэу къыхахыгъэ гъогум зэхэтхэу ныбжьыкIэ цIыкIухэр къырыкIуагъэх, нэфрыгъуазэ зытемыт лъэсрыкIо зэпырыкIыпIэр тэрэзэу зэрэзэпыпчыщтыр нэрылъэгъу афашIыгъ. Полицейскэхэр алъыплъэхэзэ, ежь-ежьырэу заулэрэ зэпырагъэкIыгъэх.
Iофтхьабзэм икIэухым Адыгеим икъэралыгъо автоинспекторхэм хэушъхьафыкIыгъэ шапхъэхэр зэрытхэгъэ тхьапэхэр хэлэжьагъэхэм афагощыгъэх.