Нахьыбэр къащэжьыгъ

IэкIыб къэралыгъо зэфэшъхьафхэм закъыщызыгъэпсэфынэу кIо­гъагъэхэм ащы­щэу тихэгъэгу къа­щэжьыгъэр нэбгырэ мин 83-рэ мэхъу. Ростуризмэм къызэ­риIорэмкIэ, джыри нэбгырэ мини 7 Iэ­пыIэгъум къежэ, на­хьыбэу ахэр зыдэ­щыIэхэр Египет ары.

— Мэфэ заулэ хъугъэу Шарм-эль-Шейхрэ Хургадэрэ ащызэхэщэгъэ рейсхэм ахэдгъэхъуагъ, — еIо Ростуризмэм ипащэу Зарина Догузовам. — Къухьэлъатэхэр Шъачэ е Минводы къызысыжьхэкIэ, ахэм къарыкIожьыгъэ цIыфхэр операторэу турыр къызщащэфыгъагъэм зыщыпсэухэрэ чIыпIэхэм анегъэсыжьых. Турпутевкэ зимыIэу шъхьафитэу хэгъэгум икIыгъагъэхэм якъэгъэзэжьыни ащыгъупшэрэп. Ахэм ащыщэу нэбгырэ мини 10 фэдизмэ лъэIу тхылъхэр Ростуризмэм къыфагъэхьыгъэх, якъэ­щэжьын Минтрансри, Росавиациери егъэгумэкIых ыкIи къыхэ­лажьэх.

Авиабилетхэр ащэфых

Тыркуем, Узбе­кистан, Армением узэранэсыщт авиа­билетхэр на­хьы­бэу цIыфхэм гъэтхэпэ мазэм зэращэфыгъэхэр ТАСС-м къытыгъ. Ахэм къакIэлъэкIох Киргизиер, Азербайджан, Казахстан, Грузиер, Израиль. Грузием нэмыкIэу адрэхэм зэкIэми авиа­рейс занкIэхэр ащызэIухыгъэх, Урысыем икъэлэ инхэм къухьэ­лъатэхэм защаIаты, ахэм тэ тикомпаниехэм яехэри ахэтых. ГущыIэм пае, Ереван убыбынэу уфаемэ, ермэл авиалиниехэм язакъоп тихэгъэгу и «Аэрофлот» ирейсхэми унагъэсыщт. Грузием укIощтмэ Стамбул, Минскэ е Ереван къухьэлъатэхэр ащызэблэпхъунхэу хъущт. Экспертхэм авиабилетхэм ауасэ зынэсыгъэр ауплъэкIугъ. Анахь макIэу ахъщэ зыптыщтыр Армениер къыхэпхыгъэмэ ары, узэрэнэсыщт закъом сомэ мин 19 тефэщт. Душанбе узэрэнэсыщт билетым сомэ мин 22-рэ, Стамбул узэрэкIощтым – мин 39,8-рэ алъыптыщт. Къэралыгъо Думэм зекIонымкIэ и Комитет хэтэу Алла Салагаевам къызэриIуагъэмкIэ, тицIыфхэу зыгъэпсэфакIо кIо­хэрэм япчъагъэ нахьыбэ къэс нахь зигопэщтхэр Тыркуер, Индиер, Египет ыкIи Вьетнам.

Къиныгъохэр текIыщтых

Венесуэла. Мы хэгъэгур ипляж­хэм­рэ хыблыгухэмрэкIэ цIэрыIу. Ащ зекIонымкIэ иминистрэ къызэриIорэмкIэ, зыгъэпсэфакIо укIоныр щынагъоу щытэп, Урысыем икIырэ хьакIэхэм сыдигъуи къапэгъокIынхэу хьазырых.

Ростуризмэм итхьаматэу З. Догузовам Венесуэлэ икъухьэ­лъатэхэм тикъэралыгъо къэбыбынхэр зэрэзэпамыгъэугъэр къыIуагъ. Ащ фэшъхьафэу ахэр Латинскэ Америкэм зэрэмыбыбыхэрэм пIэлъэ гъэнэфагъэ зэриIэр, Венесуэлэ, Кубэ, Мек­си­кэр ыкIи Доминиканскэ Рес­пуб­ликэр къэралыгъоу тызгурыIохэрэм зэращыщхэр къыхигъэщыгъ.

«КъэралыгъуитIум азыфагу зэгурыIоныгъэ зэрилъыр Урысыем и Президентэу В. Путинымрэ Венесуэлэ и Президентэу Николас Мадурорэ бэмышIэу телефонкIэ зэрэзэдэгущыIа­гъэхэм къегъэшъыпкъэжьы», — къыIуагъ Заринэ.

Тунис. Африканскэ чIынэлъэ­шхом щыщэу Тунис зыкъы­щигъэпсэфынэу ыкIи зыкъыщиплъыхьанэу зэ кIорэр кIэгъожьэу хъурэп. Ар Средиземнэ хым пэблагъ, ипс фабэ ыкIи къабзэ.

Тунис игъунапкъэхэр тицIыф­хэм афызэIухыгъэх. Ащ укIоным пае загранпаспорт уиIэн фае. ИхьакIэщыбэ псыIушъом пэблагъ, чэщи мафи къагъэгъунэх, арышъ хьакIэхэмкIэ гумэкIыгъо щыIэп. Мыщ самолетхэр зэпымыоу мэбыбых.

Тунис зэрэунагъоу зыщыбгъэ­псэфыным тегъэпсыхьагъ. Пшэ­хъуалъэхэм махъшэхэм уатесэу къащыпкIухьэшъущт, сэнэ зэфэшъхьафхэр къыщашIых, яархитектурэ зэбгъэпшэн щымыIэу гъэшIэгъоны.

Росавиациемрэ Тунис игражданскэ авиацие и ГъэIорышIапIэрэ Урысыем ибыбыкIырэ къухьэлъатэхэм япчъагъэ хагъэхъо­нэу зэзэгъы­гъэх. Тхьамафэм рейси 10 ашIыщт, гъэмафэм, ищыкIагъэ­мэ, джыри ахагъэ­хъощт.

Кипр. Урысыем щыпсэухэрэр Кипр зыкъыщагъэпсэфынэу кIонхэм фэхьазырых. Турпромым ипресс-къулыкъу къызэритыгъэмкIэ, Кипр IэкIыб хэгъэгу 20-у кIымафэми зыгъэпсэфакIохэрэр зыдакIохэрэм ащыщ. Ахъщэу гъогум тырагъэкIодэщтым процент 31-рэ къафыщагъэкIэгъагъ. Оперштабым къызэриIорэмкIэ, зыгъэ­псэфыпIэу къыхахыхэрэм ялъытыгъэу къухьэлъатэхэм тхьамафэм рейситIум къыщегъэжьагъэу тфым нэсэу ашIы.

Кипр нэмыкIэу Грецием иошъогу гъогухэри шIэхэу къызэIуа­хыжьынхэу Оперштабым къегъэгугъэх.

Таиланд. ЗекIонымкIэ Федеральнэ агентствэм ипащэ къызэриIуагъэмкIэ, Таиланд зыщызыгъэпсэфынэу кIуагъэхэм къагъэзэжьын зэралъэкIыщт шIыкIэр ведомствэм ителеграм-канал къырагъэхьагъ.

Ащ къызэрэщиIорэмкIэ, путевкэхэр зыщащэфыгъэ компаниехэм зафагъазэмэ, амалэу щыIэхэр къафаIотэщтых. Авиакомпаниехэм ахэм яахъщэхэр къаратыжьыщт е къызэрэкIожьынхэ зэралъэ­кIыщт маршрутыр къараIощт.

Зарина Догузовар упчIэ зиIэхэм зэкIэми Ростуризмэм ыкIи Общероссийскэ народнэ фронтым телефонэу 8-800-200-34-11-мкIэ афытеонхэу къяджагъ. Тайланд нэсырэ рейсхэр зэфашIыгъэхэми, «Аэрофлотым» икъухьэлъатэхэм ащыщхэр джыри мэбыбых. Урысыем и Генеральнэ консульствэу Пхукет щыIэм зыгъэпсэфакIо кIуагъэ­хэм якъэгъэзэжьынкIэ IэпыIэгъу къафэхъунэу къегъэгугъэх.

Зыгъэхьазырыгъэр Шъаукъо Аслъангуащ.