Культурэм иIофышIэ и Мафэ фэгъэхьыгъэ Iофтхьабзэхэр Адыгэ Республикэм и Къэра­лыгъо филармоние щыкIуагъ. Адыгеим и ЛIышъхьэу КъумпIыл Мурат ыцIэкIэ АР-м и ЛIышъхьэрэ АР-м иминистрэхэм я Кабинетрэ я Адми­нистрацие ипащэу Владимир Свеженец культурэм иIофышIэхэм къафэгушIуагъ.

Ащ зэрэхигъэунэфыкIыгъэмкIэ, музыкантхэм, сурэтышIхэм, театрэхэм, музейхэм, библиотекэхэм, искусствэхэмкIэ еджапIэхэм, культурэм иунэхэм яIо­фышIэхэм социальнэ мэхьанэшхо зиIэ пшъэрылъ агъэцакIэ.

«Адыгеим икультурнэ кIэн къызэтегъэнэжьыгъэным, ащ хэхъоныгъэ егъэшIы­гъэ­ным шъуишъыпкъэу шъуа­фэлажьэ, республикэми, хэгъэгуми якультурэрэ яшэн-хабзэхэмрэ ныбжьыкIэхэр нэIуасэ афэшъошIых, нэмыкI лъэпкъхэм якультурэ агъэлъапIэу ахэр шъогъасэх», — къы­Iуагъ АР-м и ЛIышъхьэрэ АР-м иминистрэхэм я Кабинетрэ я Администрацие ипащэ.

Ащ пае ищыкIэгъэ амалхэр республикэм щызэрахьэх, лъэпкъ проектэу «Культурэр», къэралыгъо программэхэр, «Единэ Россием» ипартийнэ проектхэр щыпхыращых. Культурэм хэхъоныгъэ егъэшIыгъэным гъэрекIо сомэ миллиарди 2 фэдиз пэIуагъэхьагъ.

«Тиреспубликэ ия 100-рэ илъэс ехъулIэу муници­палитет пэпчъ итворческэ коллективхэм культурнэ Iофтхьэбзэ пчъа­гъэхэр зэрахьащтых, зэнэкъокъухэр, фестивальхэр, къэгъэлъэгъонхэр зэхащэщтых. Мы илъэсыр цIыфхэм агу къинэжьыным культурэм иIофышIэхэм акIуачIэ зэрэрахьылIэщтым сицыхьэ телъ», — къыIуагъ Владимир Свеженец. Адыгеим и ЛIышъхьэу КъумпIыл Мурат ыцIэкIэ ащ культурэм иIофышIэхэм тхьашъуегъэпсэу ариIуагъ IэпэIэсэныгъэ­шхо зэрахэлъым, Iофэу зыфэгъэзагъэм зэрэфэшъыпкъэхэм, республикэм икультурэ кIэн бай икъэухъумэн яшъыпкъэу зэрэфэ­лажьэхэрэм афэшI. АР-м и ЛIышъхьэ пшъэрылъ къызэрэфишIыгъэм тетэу Владимир Свеженец культурэм иIофышIэ­хэм къэралыгъо тынхэр аритыжьыгъэх.

ЩытхъуцIэу «Адыгэ Респуб­ликэм инароднэ сурэтышI» зыфиIорэр АР-м исурэт галерее ипащэу Бырсыр Абдулахь, щытхъуцIэу «Адыгэ Республикэм изаслуженнэ артист» зыфиIорэр АР-м и Лъэпкъ театрэу И. Шъ. Цэим ыцIэ зыхьырэм иактерэу Бэгъушъэ Анзор, Урыс къэралыгъо драматическэ театрэу А. С. Пушкиным ыцIэ зыхьырэм ирежиссер шъхьаIэу Татьяна Дрожжинам, щытхъуцIэу «Адыгэ Республикэм культурэмкIэ изаслуженнэ IофышI» зыфиIорэр АР-м культурэмкIэ и Министерствэ иотдел ипащэу Ацумыжъ Лианэ афагъэшъошагъэх.

Адыгэ Республикэм и ЛIышъхьэ ирэзэныгъэ тхылъхэр аратыжьыгъэх Очэпщые дэт модельнэ тхылъеджапIэм ипащэу Бэшкэкъо Заремэ, АР-м лъэпкъ культурэмкIэ и Гупчэ испециалистэу Анжела Исаевам, АР-м и Къэралыгъо филармоние игенеральнэ директор игуадзэу Хьаджымэ Эльвирэ. АР-м и ЛIышъхьэ ипресс-къулыкъу