Донбасс дэсхэу тхьамыкIагъом хэфагъэхэм, зышъхьэ къезыхьыжьэжьыгъэхэм адеIэ зышIоигъохэм япчъагъэ хэхъо.

Ахэм IэпыIэгъу ягъэгъотыгъэ­нымкIэ политическэ партиеу «Единэ Россием» ипроект диштэу Адыгеим зихэку къэзыгъэзэжьыгъэхэр щыIэныгъэм хэгъэгъозэгъэнхэмкIэ и Гупчэ тыгъуасэ шIушIэ IэпыIэгъу афитIупщыгъ.

Гупчэм ипащэу ГъукIэлI Асхьад къызэриIуагъэмкIэ, ти­лъэпкъэгъухэу Косовэ, Тыркуем, Сирием къарыкIыжьхи зичIыгужъ къэзыгъэзэжьыгъэхэм зэ­хашIыкIы мы уахътэм Украинэм щыпсэухэрэр тхьамыкIагъоу зыхэтхэр. Ащ пае нахьыбэрэ агъэфедэрэ пкъыгъохэр, гъомылэпхъэ зэфэшъхьафхэр зыхэхьэрэ шIушIэ IэпыIэгъоу афэлъэкIыщтыр зихэку къэзыгъэзэжьыгъэ тилъэпкъэгъухэм аугъоигъ. Ащ нэмыкIэу Гупчэм сыдигъуи IэпыIэгъу къыфэхъурэ ООО-у «ДомХимБыт» зыфи­Iорэм ипащэу Натхъо Пщымафэ сомэ мини 150-рэ зыосэ тхьа­кIэн-лъэкIэн Iофхэм ащагъэфедэрэ пкъыгъо зэфэшъхьафхэр къыригъэгъусагъэх.

— Дзэ операциеу УФ-м и Президентэу Владимир Путиным рихьыжьагъэм детэ­гъаштэ. Джащ фэдэу цIыф къызэрыкIохэу ДНР-м ыкIи ЛНР-м ащыпсэухэрэм тызаракъотым ишыхьатэу шIушIэ IэпыIэгъур къэтыугъоигъ. Мыр аужырэщтэп, джыри тапэкIи Iофтхьабзэр лъыдгъэкIотэщт, — къы­Iуагъ Гупчэм ипащэу Гъу­кIэлI Асхьад.

АР-м и ЛIышъхьэу КъумпIыл Мурат къызэриIуагъэмкIэ, зышъхьэ къезыхьыжьэжьыгъэхэм адеIэхэ ашIоигъоу шIушIэ IэпыIэгъур зыугъоигъэ тилъэпкъэ­гъухэр заохэм апхырыкIыгъэх, ащ икъиныгъохэр зэхашIагъ.

— Зышъхьэ къезыхьыжьэжьыгъэхэм якъин зэхэзышIыкIы­гъэу, адэIэпыIэныр зипшъэрылъэу зылъытэхи, IэпыIэгъу афэхъугъэ пстэуми лъэшэу сафэраз, — къыIуагъ КъумпIыл Мурат.

Iэшъынэ Сусан.

Сурэтхэр А. Гусевымрэ А. Iэшъынэмрэ тырахыгъэх.