Экономикэм ылъэныкъокIэ Iофхэр къызэрыкIоу щымытхэми, рахъухьэгъэ проектхэмрэ социальнэ пшъэрылъхэмрэ Адыгеим щагъэцэкIэщтых. МыщкIэ федеральнэ IэпыIэгъур къызфагъэфедэщт.

Адыгэ Республикэм и ЛIышъхьэ къы­зэрэхигъэщыгъэмкIэ, хэгъэгум и Президентэу Владимир Путиным шъолъыр­хэм япащэхэм бэмышIэу адыриIэгъэ зэIукIэм къыщыхигъэщыгъагъ социальнэ пшъэрылъхэмрэ лъэпкъ проектхэмрэ зэкIэ гъэцэкIэгъэнхэ зэрэфаер. Къэралыгъом ипащэ пшъэрылъ гъэнэфагъэхэм ямызакъоу, кризисым пэшIуекIорэ Iоф­тхьабзэхэм зэшIохыкIэу афэхъущтхэми къатегущыIэгъагъ.

«Тэри къэралыгъо пшъэрылъхэу мэхьанэшхо зиIэхэр зэкIэ дгъэцэкIэщтых, зы социальнэ проекти къызэтетIэжэщтэп», – къыхигъэщыгъ КъумпIыл Мурат.

Адыгэ Республикэм и ЛIышъхьэ къы­зэриIуагъэмкIэ, экономикэм IэпыIэгъу тыфэхъуным пае Iофтхьабзэхэр лъыдгъэкIотэщтых, фэгъэкIотэныгъэ зыхэлъ кредитхэр, субсидиехэр, джащ фэдэу грантхэр къэдгъэнэжьыщтых.

Анахь мэхьанэ зиIэ пшъэрылъхэм ащыщ финанс уплъэкIуныр. Муниципалитетхэм ябюджетхэм хъарджхэм алъэ­ныкъокIэ пстэуми апэу анахь мэхьанэ зиIэ пшъэрылъхэм ягъэцэкIэн къащыдалъытэ. Бюджетым ихахъохэр нахьыбэ шIыгъэнхэм епхыгъэ пшъэрылъ заулэмэ ягугъу ащ къышIыгъ. Непэ финансхэмкIэ Iофхэр зыпкъ итых.

Адыгэ Республикэм финансхэмкIэ и Министерствэ къызэритыгъэмкIэ, мы илъэсым иапэрэ мэзитIу бюджетым ихэбзэIахь ыкIи имыхэбзэIахь хахъохэр сомэ миллиарди 2-рэ миллиони 167-м нэсыгъэх, илъэсэу икIыгъэм иджырэ фэдэ лъэхъан елъытыгъэмэ, ар проценти 130,1-рэ мэхъу.