Адыгеим и ЛIышъхьэу КъумпIыл Мурат оперативнэ штабым изэхэсыгъо тыгъуасэ зэрищагъ. Ащ хэлэжьагъэх АР-м и Премьер-министрэ ипшъэрылъхэр зыгъэцакIэу КIэрэщэ Анзаур, федеральнэ къулыкъухэм ячIыпIэ органхэм, ведомствэ зэфэшъхьафхэм япащэхэр, Адыгэ Республикэм иминистрэхэм я Кабинет хэтхэр, муниципальнэ образованиехэм япащэхэр.

Iофхэр экономикэм зэрэщызэпыфэ­хэрэм, санкциехэм зэрапэшIуекIощтхэ амалхэу федеральнэ гупчэми, респуб­ликэми аштагъэхэр зэрагъэцакIэхэрэм зэхэсыгъом щатегущыIагъэх.

Урысые Федерацием и Президентэу Владимир Путиным къыгъэуцугъэ пшъэ­рылъ шъхьаIэхэм экономикэр зэтемыгъэзыгъэныр зэращыщыр Адыгеим и ЛIышъхьэ къыхигъэщыгъ. А пшъэрылъыр зэшIохыгъэным пае федеральнэ гупчэм игъо елъэгъу IофшIэпIэ чIыпIэхэр нахьыбэ шIыгъэнхэу, предпринимательхэр яIофшIэн кIэгъэгушIугъэнхэу, экономикэм ипредприятие, иотраслэ шъхьаIэхэу чIыпIэ къин иуцуагъэхэм IэпыIэгъу афэхъугъэнэу. Республикэми бизнесым IэпыIэгъу зэрэфэхъущтхэ шIыкIэр щагъэ­нэфагъ. ГущыIэм пае, шъолъыр микрофинанс компаниеу «АР-м ипредпринимательствэ IэпыIэгъу зэрэфэхъухэрэ фондым» предпринимательствэ цIыкIум­рэ гурытымрэ ахэщагъэхэм чIыфэхэр аретых.

Адыгеим и ЛIышъхьэ чIыгулэжьхэм IэпыIэгъу зэрарагъэгъотыщт амалхэу хэгъэгум и Правительствэ игъо ылъэгъугъэхэр нахь чанэу къызфагъэфедэнхэу пшъэрылъ афишIыгъ. Мэкъумэщ техникэм икъэщэфынкIэ фэгъэкIотэныгъэ зиIэ чIыфэхэр къафыхэгъэкIыгъэным, АПК-м ипредприятиехэм чIыфэхэр ятыгъэнхэм, коцым икъэгъэкIынкIэ, хьалыгъум игъэжъэнкIэ мылъкоу агъэкIодыгъэм щыщ къафягъэгъэзэжьыгъэным ар афэгъэхьыгъ. Мэкъумэщ потребительскэ кооперативхэм субсидиехэр, IофшIэныр езыгъэжьэгъэкIэ фермерхэм «Агростартапым» игрантхэр аратыщтых.

Товархэр къыдэзыгъэкIыхэрэмкIи, цIыфхэмкIи шэмбэтрэ тхьаумафэмрэ зэхащэхэрэ ермэлыкъхэр Iэрыфэгъух. АР-м и ЛIышъхьэ пшъэрылъ зэрафишIыгъэм тетэу ермэлыкъхэр нахьыбэрэ зэ­хащэзэ ашIыщт. КъумпIыл Мурат биз­несменхэм адыриIэгъэ зэIукIэгъухэм гъомылапхъэхэр къэзыхьыжьхэрэми, гъомлэпхъэшI промышленностым илIыкIохэми ащязэгъыгъ ежьхэм къазэрафекIугъэ уасэмкIэ ермэлыкъхэм продукциер ащащэнэу.

IофшIэнымкIэ бэдзэрым иIофхэм язытети зэхэсыгъом шъхьафэу щытегущыIагъэх. Товарэу къыда­гъэкIырэм къыкIемыгъэ­чыгъэным­кIэ, IофшIэпIэ чIыпIэхэр къызэтегъэ­нэжьыгъэн­хэмкIэ бизнесым IэпыIэгъу зэ­рэфэ­хъущтхэ Iоф­тхьабзэхэм мыщкIи лъэ­шэу анаIэ щатырагъэты. Предпринимательствэ цIыкIумрэ гурытымрэ ахэщагъэхэм чIыфэхэр ятыгъэнхэм, бизнес-проектыкIэхэм ягъэцэкIэн япхыгъэ Iо­фы­гъохэм анахьэу анаIэ атыра­гъэты.

Адыгэ Республикэм щыпсэухэрэм IофшIэн къафэзыгъотырэ къэралыгъо къулыкъум и Гъэ­IорышIапIи программэ заулэ егъэцакIэ. Адыгеим и ЛIышъхьэ ащ пшъэ­рылъ фишIыгъ IофшIэн зимыIэхэр IофшIапIэхэм аIугъэхьэгъэнхэмкIэ, рес­публикэм ипредприятиехэр зыфыщыкIэрэ сэнэхьатхэм афегъэджэгъэнхэмкIэ, цIыфхэм IофшIэн къафэгъо­тыгъэ­нымкIэ федеральнэ гупчэм зэрихьэрэ Iофтхьабзэхэм афэдэхэр шIуагъэ къытэу агъэфедэнхэу.

«Шъолъырхэм къашъхьэпэщт унашъо­хэр хэгъэгум и Президент зэриштагъэхэр лъэшэу тигуап. Экономикэми, социальнэ лъэны­къоми псынкIэу Iофтхьабзэхэр ащызетхьанхэмкIэ ахэм яшIуагъэ къы­тэкIыщт. Къэралыгъом ипащэ социальнэ пшъэрылъхэр, лъэпкъ проектхэр, къэралыгъо программэхэр зэкIэ дгъэцэкIэнхэ фаеу пшъэрылъ къытфишIыгъ», — къы­Iуагъ Адыгеим и ЛIышъхьэ.

Проектхэм япхырыщынкIэ зэзэгъыныгъэхэр зэрэзэдашIыщтхэм япхыгъэ Iофыгъохэм, федеральнэ хэбзэгъэуцугъэм фашIыгъэ зэхъокIыныгъэхэм ади­штэу ахэр зэрагъэцэкIэщтхэм зэхэсыгъом анаIэ щатырагъэтыгъ. Ведомствэ пэпчъ ипащэ лъэпкъ проектхэмкIэ Iоф­тхьабзэхэу зэрахьащтхэмкIэ ыкIи зэзэгъыныгъэхэр зэрадашIыхэрэмкIэ отчетхэр къашIыгъэх.

Щагухэм, общественнэ чIыпIэхэм язэтегъэпсыхьанкIэ, гъогухэмрэ инженер инфраструктурэмрэ язытет нахьышIу шIыгъэнымкIэ, социальнэ псэуалъэхэм ягъэцэкIэжьынкIэ ыкIи яшIынкIэ пшъэ­рылъ заулэ АР-м и ЛIышъхьэ афишIыгъ. Анахьэу анаIэ зытырагъэтыщтхэр индустриальнэ паркымрэ турист комплекс­хэмрэ ягъэпсын епхыгъэ проектышхо­хэм ягъэцэкIэн ары. Игъом аукционхэр зэхащэнхэм, бюджет мылъкур икъоу къыз­фагъэфедэным мэхьанэшхо зэряIэр КъумпIыл Мурат къыхигъэщыгъ.

«Зыпкъ итэу экономикэм Iоф ышIэнымкIэ амалхэр зэрахьанхэм, зэдиштэу чIыпIэхэм хэхъоныгъэ ягъэшIыгъэным, инвестиционнэ площадкэхэр зэхэщэгъэнхэм мэхьанэшхо яI. Социальнэ пшъэ­рылъхэр зэкIэ дгъэцэкIэщтых. ШIуагъэ къэзытыщт проектхэм адедгъэштэщт», — къыIуагъ рес­публикэм ипащэ.

АР-м и ЛIышъхьэ ипресс-къулыкъу