Республикэм ипащэхэмрэ партиеу «Единэ Россиемрэ» зэрахьэгъэ Iофтхьабзэхэм яшIуагъэкIэ 2022 – 2024-рэ илъэсхэм ателъытэгъэ федеральнэ бюджетым къыхэгъэкIыгъэ сомэ миллиард 1,5-рэ Адыгеим къыфатIупщыщт, автомобиль гъогухэр ыкIи искусственнэ гъогу псэуалъэхэр зэтегъэпсыхьэгъэнхэм мылъкур пэIуагъэхьащт.

Джащ фэдэу гъогу хъызмэтым иинфраструктурэ хэхъоныгъэ ышIыным фэшI мы илъэсым сомэ миллион 604,2-рэ къыфыхагъэкIыщт. 2022 – 2023-рэ илъэс­хэм ателъытагъэу Мыекъуапэ къэзыухьащт автомобиль гъогум игъэпсын тефэщт сомэ миллиарди 3 шъолъырым къыIукIэщт.

Ащ нэмыкIэу федеральнэ бюджетым къыхэгъэкIыгъэ ахъщэ тедзэ шъолъырхэм атырагощагъ. Федеральнэ мэхьанэ зиIэ гъогухэм язэтегъэпсыхьан ар пэIуагъэ­хьащт.

Адыгеим гъогухэр щышIыгъэнхэм пае мыгъэ – сомэ миллион 50, 2023-рэ илъэсым – миллиони 100, ащ къыкIэлъы­кIощтым – сомэ миллиони 150-рэ къыфатIупщы. Ар къыIуагъ УФ-м и Къэралыгъо Думэ идепутатэу Владислав Резник. Ащ къызэрэхигъэщыгъэмкIэ, автомобиль гъогоу А-146 «Краснодар – Верхнебаканскэм» хэхьэрэ я 19-рэ километрэу Тэхъутэмыкъое районым пхырыкIырэм игъэцэкIэжьын ыкIи мы чIыпIэм транспорт зэхэкIыпIэ щышIыгъэ­ным мылъкур апэIуагъэхьащт.

Адыгеим и ЛIышъхьэу КъумпIыл Мурат къызэриIуагъэмкIэ, шэпхъэшIухэм адиштэрэ гъогу инфраструктурэр гъэпсыгъэныр Урысыем и Президентэу Владимир Путиным пшъэрылъ шъхьаIэу къыгъэуцухэрэм ащыщ. Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм, федеральнэ ыкIи шъолъыр программэхэм яшIуагъэкIэ ар республикэм зэрифэшъуа­шэу щыгъэцэкIагъэ мэхъу. Мы лъэныкъомкIэ пэрытныгъэ зыIыгъ шъолъыр­хэм Адыгеир ащыщ.

— Республикэм ипащэхэр тигъусэхэу ыкIи «Единэ Россиер» тиIэпыIэгъоу гъогухэм яшIын пэIухьащт мылъкур федеральнэ бюджетым къыт­фыхагъэ­кIыным тыпылъыщт, — къы­Iуагъ Владислав Резник.