Республикэм ихъухьэрэр, Парламентым иIоф зэрэзэхэщагъэр зэрифэшъуашэу къизыIотыкIырэ журналистхэм защыфэгушIо­гъэхэ зэхахьэ тыгъуасэ Мыекъуапэ щыкIуагъ. Iофтхьабзэм хэлэжьагъэх АР-м и Къэралыгъо Совет – Хасэм и Тхьама­тэу Владимир Нарожнэр, Парламентым идепутатэу Шэ­уджэн Тембот, республикэм икъэбарлъыгъэIэс амалхэм яIофышIэхэр.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковым пэуб­лэм къыIуагъ мы илъэсым мэхьанэшхо зиIэ мэфэкIхэмкIэ республикэр зэрэбаир, Адыгеим къэралыгъо гъэпсыкIэ зиIэр илъэси 100 ыкIи АР-м и Парламент зызэхащагъэр илъэс 30 мэхъух.

Владимир Нарожнэр игуапэу журналистхэм къафэгушIуагъ. Iофэу ахэм агъэцакIэрэм хабзэмкIи обществэмкIи мэхьанэшхо зэриIэр хигъэунэфыкIыгъ. ЦIыфхэм игъом къэбар шъыпкъэр алъагъэIэсызэ, ахэр зыгъэгумэкIырэ Iофыгъохэм язэхэфынкIэ, дунэееплъыкIэ тэрэз яIэнымкIэ тапэкIи чанэу Iоф ашIэнэу, ягъэхъагъэхэм ахагъэхъонэу журналистхэм къафэлъэIуагъ.

Шэуджэн Тембот депутатхэм ацIэкIэ журналистхэм шIуфэс къарихыгъ ыкIи мы охътэ къинэу тызыхэтым хабзэмкIи обществэмкIи мэхьанэшхо зиIэ IофшIэныр зэрифэшъуашэу ахэм зэрагъэца­кIэрэр къыIуагъ. Нэужым АР-м и Парламент илъэс 30 зэрэхъурэм фэгъэхьыгъэ творческэ зэнэкъокъоу зэхащагъэм кIэкIэу къытегущыIагъ. Журналистхэр ащ чанэу хэлэжьэнхэу къя­джагъ. Ащ нэмыкIэу, илъэс заулэ хъугъэу хэбзэ къулыкъур яIэпыIэгъоу ныбжьыкIэхэм шIэныгъэ зыщызэрагъэгъотырэ научнэ организациехэм азыфагу Урысые зэнэ­къокъоу «Моя законотворческая инициатива» зыфиIорэр рагъэкIокIыгъ. Ащ текIоныгъэ къыщыдэзыхыгъэ студентхэм рэзэныгъэ тхылъхэр аритыжьыгъэх.

Ащ нэмыкIэу лъэныкъо зэфэшъхьаф­хэмкIэ къахэщыгъэ журналистхэм ахъщэ шIухьафтынхэмрэ дипломхэмрэ комитетым аритыжьыгъэх. Ахэм ащыщ тиIофшIэгъоу, «Адыгэ макъэм» иредактор шъхьаIэ игуадзэу МэщлIэкъо Саидэ.