ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «РЗК «Ресурсым» хахьэу ООО-у «Ставропольский бройлер» зыфиIорэ площадкэ ин Кощхьаблэ къыщызэIуахыгъэу Iоф ешIэ.

Ащ именеджерэу Гъажэ Хьэзрит къы­зэрэтфиIотагъэмкIэ, «Ресурсыр» организацие инэу щыт ыкIи лъэныкъо зэфэшъхьафхэр ащ къызэлъеубытых: къэгъэкIыныр, чэтхъуныр, мэкъу-мэщыр, псэолъэ­шIыныр. 2021-рэ илъэсым мэзаем Кощ­хьаблэ къыщызэIуахыгъэ ООО-у «Ставропольский бройлер» зыфиIорэр зыфэгъэзагъэр чэтхъуныр ары.

Хьэзрит къызэриIуагъэмкIэ, чэтхъуным ылъэныкъокIэ предприятиер зыщагъэ­псыгъэ чIыпIэр хъопсапIэу зэрэщытыр къыдалъыти, Кощхьаблэ площадкэр къыщызэIуахыгъ. Илъэс заулэкIэ узэкIэ­Iэбэжьмэ, мы чIыпIэр чэтэхъо фабрикэу щытыгъ, псэуалъэу къызэтенагъэхэм язытет мыдэгъушхуагъэми, ахэр икIэрыкIэу зэтырагъэпсыхьажьыгъэх.

— ЗэкIэмкIи корпус 20 къызэIутхыгъэу Iоф ашIэ. Чэщ-зымафэм къыкIоцI къыращыгъэ чэтыжъыехэр къытфащэх, атакъэмрэ чэтымрэ зэхэтымыгъахьэхэу шъхьафэу корпусхэм арэтэгъэтIысхьэх. Ахэр мэфи 140-м къыкIоцI тэгъашхэх, ящыкIагъэр ятэшIылIэ. Уахътэр къызысыкIэ ахэр зыщагъэкIэцIыщтхэ площадкэ­хэу станицэу Кавказскэм ыкIи Кореновскэм адэтхэм ащэх. КIэнкIэр къызщатырэ уахътэр заухыкIэ, зыщаукIыщтхэ цехым ащэх ыкIи лыр IуагъэкIы, – еIо Хьэзрит.

Чэтыжъыехэм арагъэшхырэ Iусыр «РЗК «Ресурсым» ипредприятиеу «Адыгейский комбикормовый завод» зыфиIоу Джаджэ дэтым къаIэкIегъахьэ. Цеххэм ачIэт Iэмэ-псымэхэр кIэх, автоматикэ шIыкIэм тетэу Iоф ашIэ. ЗэкIэмкIи мыщ нэбгырэ 82-мэ Iоф щашIэ, гурытымкIэ лэжьапкIэу яIэр сомэ мин 30 — 35-рэ.

— Непэ Урысыер пштэмэ, чIыпIэ къи­нэу зэрытыр дэгъоу къыдгурэIо. Арэу щытми, тыгу дгъэкIодырэп, зыпари пэрыохъу къытфэмыхъоу тиIофшIэн лъытэгъэкIуатэ. ЗэигъэтIысхьагъум чэты­жъые мин 246-м ехъу къыхеубытэ. Ахэр псаоу къэдгъэхъунхэмкIэ планэу тиIэр процент 96-рэ мэхъумэ, процент 98-кIэ тэгъэцакIэ. Тхьамэфэ 20 фэдизрэ ахэр къэтэгъэгъунэх, нэужым зыщагъэкIэ­цIыщт площадкэм етIани ахэр тхьамэфэ 41-рэ щаIыгъых. Площадкэр Кощхьаблэ къызыщызэIутхыгъэм щыублагъэу тIогъогогъо чэтыжъыехэр итщыгъах. Гъэтхапэм и 22-м ящэнэрэу идгъэтIысхьагъэх. ГурытымкIэ къэпIон хъумэ, илъэсым игъэтIысхьагъуитIу тэшIы, — къыIуагъ Гъажэ Хьэзрит.

Площадкэм именеджер къызэриIуагъэмкIэ, IофшIакIохэм ащыкIэхэрэп, къаштагъэхэм зэкIэми IэпэIэсэныгъэ ахэлъэу япшъэрылъхэр агъэцакIэх. Кощ­хьаблэ нэмыкIэу мыщ фэдэ площадкэхэр Мыекъуапэ ыкIи Хьакурынэхьаблэ адэтых. Яофис шъхьаIэр Шытхьалэ щыI.

Хьэзрит Къэбэртэе-Бэлъкъар Респуб­ликэм ит къуаджэу Псыкод 1980-рэ илъэсым къыщыхъугъ. Къэбэртэе-Бэлъкъар мэкъумэщ академиер къыухыгъ. ИшIэныгъэхэм ахигъэхъонэу Англием агъакIуи, илъэситIо ащ къэтыгъ. 2006-рэ илъэсым Владикавказ мэкъумэщ университетым мэкъумэщ шIэныгъэхэмкIэ кандидатыцIэр къыщигъэшъыпкъэжьыгъ. 2013-рэ илъэсым Ростов дэт «РЗК «Ресурсым» иIофшIэн щыригъэжьагъ, нэужым 2014-рэ илъэсым агроном-технолог IэнатIэр къыратыгъ. Ащ илъэситIо Iоф щишIагъэу, Ессентуки агъэкIуагъ ыкIи 2021-рэ илъэсым нэс менеджерэу Iутыгъ. Ыгуи ыпси етыгъэу, щытхъу хэлъэу иIофшIэн зэригъэцакIэрэм зэхэщакIохэм гу лъати, Кощхьаблэ щагъэ­псыгъэ площадкэ иным пэщэныгъэ дызэрихьанэу къагъэкIуагъ. Зоотехникым ыкIи ветеринарием афеджэжьи, диплом къыдихыжьыгъ. Мэкъумэщ шIэныгъэхэмкIэ кандидат. ИIофшIагъэ уасэ къыфашIи «Мастер своего дела», «Открытие года» зыфиIорэ щытхъу тхылъхэмкIэ къыхагъэщыгъ. Хьэзрит унэгъо дахэ иI, ишъхьэгъусэрэ ежьыррэ сабыищ зэдапIу.

— Адыгеим сыкъыщымыхъугъэми, Iоф щысшIэныр къин къысщыхъугъэп, а зы лъэпкъым тыщыщ, зэкIэми тыадыг, бзэмкIи дэгъоу тызэгурэIо. Коллектив дэгъу къызэрэугъоигъ, сигуапэу Iоф адэсэшIэ, ащкIэ зыпари гумэкIыгъо щыIэп. ТапэкIи къиныгъохэм тыкъамыгъащтэу IофшIэным зэредгъэхъущтым, республикэм федэ къызэрэфэтхьыщтым тыпылъыщт, — къыIуагъ Гъажэ Хьэзрит.

КIАРЭ Фатим.