ПрограммированиемкIэ дунэе студенческэ чемпионатэу «ICPC» зы­фи­Iорэм Адыгэ къэралыгъо университетым икомандэ хэлэжьэщт. Мэ­лылъфэгъум и 12-м — 13-м ар къалэу Санкт-Петербург щыкIощт.

Приволжскэ, Къыблэ ыкIи Темыр Кавказ федеральнэ шъо­лъырхэм ащыщ командэ 450-рэ ащ хэлэжьэнхэу лъэIу тхылъ къатыгъ, ахэм командэ 60 къа­хахыгъ.

Финалныкъом командэ 23-рэ ихьагъ. Ахэм ащыщых Адыгэ къэралыгъо университетыр, Казанскэ ыкIи Къыблэ федеральнэ университетхэр, Нижегородскэ, Пензенскэ Саратовскэ, Волгоградскэ къэралыгъо университетхэр.

Адыгэ къэралыгъо универ­ситетым икомандэ хэхьагъэх студентхэу Анна Неопрятнэр, Александр Кузнецовыр ыкIи Владимир Верденкэр. Апэрэ турым изэфэхьысыжьхэмкIэ ахэм ящэнэрэ шъуашэ зиIэ дипломхэр къафагъэшъошагъэх.

Командэм итренерыр АКъУ-м икафедрэ ипащэу Алый Марат ары. 2004-рэ илъэсым къыщегъэжьагъэу ар зипэщэ купхэр программированиемкIэ дунэе чемпионатым ифиналныкъо гъогогъуи 5 ихьагъэх.

«Тистудентхэр мыщ фэдэ проектхэм зэрахэлажьэхэрэм шIогъэ ин пылъ. Чемпионатым текIоныгъэ къыщыдэзыхыгъэхэр урысые ыкIи дунэе IT-компаниехэм Iоф ащашIэн амал яIэщт», — еIо Алый Марат.