Урысые гъэсэныгъэ проектэу «Урок цифры» зыфиIорэм Адыгеир хэлажьэ. Гъэтхапэм и 10-м къыщегъэжьагъэу мэлылъфэгъум и 10-м нэс ар щыIэщт.

Республикэ естественнэ-­хьисап еджапIэм игъэсэныгъэ Гупчэу «IT-клуб» зыфиIорэм урокыр щыкIуагъ. Мыекъуапэ илицееу N 19-м икIэлэеджа­кIохэр Iофтхьабзэм къекIолIагъэх, республикэм ирайонхэм арыт гурыт еджапIэхэр онлайн шIыкIэм тетэу хэлэжьагъэх. Квантовэ компьютерыр зэрэзэхэлъыр, ащ шIуагъэу пылъыр, ишъэфхэр ныбжьыкIэхэм зэ­рагъэшIагъ.

«Урок цифры» зыфиIорэр гъэсэныгъэ проектэу щыт. Ащ ишIуагъэкIэ, технологическэ ком­пание анахь дэгъухэм кIэлэеджакIохэм шIэныгъэ ара­гъэгъотын амал щыI, цифрэ шIы­­кIэм тетэу гъэпсыгъэ экономикэр зэрагъашIэ.

АНО-у «Цифровая экономика» зыфиIорэр, УФ-м цифрэ шIыкIэм хэхъоныгъэ ышIынымкIэ, зэпхыныгъэмкIэ ыкIи коммуникацие жъугъэмкIэ и Министерствэрэ УФ-м просвеще­ни­емкIэ Министерствэмрэ Iоф­тхьабзэм кIэщакIо фэхъугъэх.

— Цифрэ шIыкIэм тет гъэ­сэныгъэм епхыгъэ Iофтхьабзэу зэхатщэхэрэмкIэ мыр я 8-рэ урок. КIэлэеджакIохэмкIэ ар гъэ­шIэгъоныщт, квантовэ физи­кэр зыфэдэр, компьютерыр зэрэбгъэфедэщтыр алъэ­гъущт. ДжырэкIэ Росатомым ишIуа­гъэ­кIэ квантовэ дунаим хэшIыкI фытиI, квантовэ зэхэлъ­хьаныр, зэ­хэхыныр ыкIи нэ­мыкI лъэныкъохэр тэшIых. КъыткIэ­хъу­хьэрэ лIэужхэм ар ашIэн фае, — еIо Гупчэу «IT-клуб» зыфиIорэм ипащэу Алый Марат.

«Урок цифры» зыфиIорэ Iоф­тхьабзэр кIэлэеджакIохэм гъэшIэгъонэу афызэхащагъ. Квантовэ компьютерыр зэрэбгъэфедэн плъэкIыщтыр къизыIо­тыкIырэ видеоролик кIэлэ­еджакIохэм къафагъэлъэгъуагъ. Нэужым IофшIэнхэм ауж ихьагъэх.

— «Урок цифры» зыфиIорэм ятIонэрэу сыхэлажьэ. Блэ­кIыгъэ Iофтхьабзэр лъэшэу сыгу рихьыгъэти, джыри сыкъэкIуагъ. Мы лъэныкъомкIэ сишIэныгъэ­хэм ахэзгъэхъощт, — еIо лицееу N 19-м икIэлэеджакIоу Михаил Назаренкэм.