Мыекъопэ къэралыгъо технологическэ университетым предмет зэфэшъхьаф­хэмкIэ олимпиадэхэр зэхещэх.

Ащ хэлажьэх гурыт еджапIэр къэзыухырэ кIэ­лэеджакIохэмрэ гурыт сэнэхьат зыщызэрагъэ­гъотырэ учреждениехэм ястудентхэмрэ. Мы илъэсым хьисапымкIэ, уры­сыбзэмкIэ, физикэмкIэ, хи­миемкIэ, обществознаниемкIэ, биологиемкIэ ыкIи тарихъымкIэ ныбжьыкIэхэм заушэтыгъ.

Предмет зэфэшъхьаф­хэмкIэ зэхащэрэ олим­пиадэхэм мэхьанэшхо яI. ЗыкI къэралыгъо ушэтынхэм языфэгъэхьазырынкIэ яшIуагъэ къызэрэкIо­рэм имызакъоу, ящыIэныгъэ зэрапхыщт сэ­нэ­хьатым икъыхэхынкIэ Iэ­пыIэгъу къафэхъух.

Мыекъопэ къэралыгъо технологическэ универ­ситетым щызэхащэгъэ олимпиадэхэм Мыекъуапэ, Адыгэкъалэ, Шытхьалэ республикэм ирайон зэ­фэшъхьафхэм арыт гъэсэныгъэм иучреждение 42-мэ ащеджэрэ кIэлэ­еджэкIо 306-рэ ахэлэ­жьагъ.

Олимпиадэхэм зэфэ­хьы­сыжьэу афэхъугъэхэмкIэ, нэбгыри 9-мэ текIоныгъэ къыдахыгъ, нэбгырэ 21-мэ хагъэунэфыкIырэ чIыпIэхэр къафагъэ­шъошагъэх. Мы апшъэрэ еджапIэм чIэхьанэу фаехэм балл тедзэхэр — текIоныгъэ къыдэзыхыгъэ­хэм балли 10, хагъэунэфыкIырэ чIыпIэхэр къызыфагъэшъошагъэхэм бал­­ли 8 къафыхагъэхъощт.

Мы мафэхэм мэфэкI шIыкIэм тетэу текIоныгъэ къыдэзыхыгъэ ныбжьыкIэ­хэр ыкIи ахэм якIэлэегъа­джэхэр агъэшIуагъэх.