Республикэм и Лъэпкъ театрэу Цэй Ибрахьимэ ыцIэ зыхьырэм  «Къэ­зыгъэзэжьырэр Тхьэм ештэжьы» зыфиIорэ спектаклыр къыщагъэ­лъэ­гъуагъ.

Абхъазым, Адыгеим искусствэхэмкIэ язаслуженнэ Iофы­шIэшхоу, режиссерэу Нэгъой Инвер пьесэр ытхыгъ ыкIи театрэм щигъэуцугъ.

ШIулъэгъум, ныбжьыкIэгъум, сэнэхьатым икъыхэхын афэ­гъэхьыгъэ спектаклым уегъэгупшысэ, уегъэщхы, зэфэхьысыжьхэр уегъэшIых.

Артистэу Хьакъуй Анзаур Батмызэ ироль къешIы. ИныбжьыкIэгъум пшъэшъэ къопцIэ ищыгъэ дахэу Марет шIу ылъэ­гъугъ. Гум щыщ хъугъэу ылъы­тэщтыгъ, ау инасып къыхьыгъэп. Пшъашъэм артист сэнэхьатыр къыхихынэу зэреджэрэр Батмызэ зызэхехым, унагъо зэ­дыряIэнэу фэежьыгъэп. КIалэр къалэм щыпсэунэу кIуагъэ, бизнесым хэхьагъ. Илъэс 20-м къыщымыкIэу Iоф ышIагъ, къыщэтхъух. Арэу щытми, шъхьэгъусэ иIэпышъ, ыгукIэ рэхьатырэп. Къыгъэхъэгъэ ахъщэм щыщ ышыпхъу икIалэ тыритхэнэу унашъо ешIы…

Батмызэ дахэу, къекIоу зефапэ. Джэнэ фыжьыр щыгъ, иныбджэгъухэу чылэм дэсхэм аIокIэ, упчIэжьэгъу ешIых.

Адыгэ Республикэм изаслуженнэ артистэу Ахьмэт Артур ныбджэгъум ироль къышIызэ, щыIэныгъэм еплъыкIэ зэфэ­шъхьафхэр фыуегъэшIых. Батмызэ ар дэгущыIэ, хэкIыпIэхэм алъэхъух. Батмызэ ышыпхъоу Сачнэт, Адыгэ Республикэм иза­служеннэ артисткэу Хьэ­лащтэ Саныет ролыр къешIы, зэдэгущыIэгъухэм ахэлажьэ.

Хэт сыд къыIуагъэми, Батмызэ ишIулъэгъу щыгъупшэрэп, Марет ынэгу кIэкIырэп.

ГэшIэгъоныр Марети дэмыкIуагъэу зэрэпсэурэр ары. Ро­лым артисткэу КIэмэщ Разыет псэ къыпигъэкIэгъэ къодыеп, гукIэ ухещэ. Артисткэм амалэу ыгъэфедэхэрэм зэу ащыщ залым чIэсхэм къызэряупчIырэр, хэкIыпIэ зэфэшъхьафхэр зэрэщыIэхэр.

Марети иапэрэ шIулъэгъу щыгъупшагъэп, ау сыдэущтэу ар хъулъфыгъэм (Батмызэ) риIощта? Марет ригъэджэрэ студентхэм ащыщ Iофым къыхегъэлажьэ, артисткэр Тхьэркъуахъо Марджэнэт. Пшъашъэр игъусэу Марет ныом фэдэу зефапэшъ, Батмызэ IокIэх.

Гум икIырэ IаплI фабэр ­Ма­­рет рещэкIы Батмызэ. «А тян», ыIозэ Батмызэ дэгущыIэ ныом. Марет дэеу зэхихэу къы­зэриIуагъэр Батмызэ ышIошъ хъугъэшъ, мэкъэ IэтыгъэкIэ ны­ом еушъыи.

Режиссерым ишIушIагъэ мы пычыгъоми дэгъоу къыщэлъагъо. Спектаклым уигъэщхызэ, урегъэгупшысэ. Батмызэ икъэщэнэу ылъытэрэр къышIэжьырэп. А уахътэм артисткэхэу

Р. КIэмэщымрэ М. Тхьэркъуа­хъомрэ комедием ижанрэ ухащэ, уагъэщхы, гум ихъы­кIырэм язекIокIэ-шIыкIэхэмкIэ укъы­ра­щалIэ.

Артистхэу Болэкъо Адамэ, Дэмэлые Казбек, УдыкIэко

Ис­лъам къашIырэ рольхэр хъу­гъэ­-шIагъэхэр зэзыпхыхэрэм ащыщых. Орэд къыIощтми

А. Болэкъом уегъэгушхо. Ар­тистыр артист зышIырэ нэша­нэхэм зэралъыхъурэр къыхэщы.

Орэдым иджэмакъ

Композиторэу ЛIыIужъу Къэ­лэшъао ыусыгъэ орэдхэр шIу­лъэгъум фэгъэхьыгъэхэ къо­дыеп. Гур шIулъэгъум ыбзэкIэ къагъэгущыIэ, орэд къырагъаIо. ЯшIулъэгъу тыгъэм пэшIэтэу, янасып зэдагощын алъэкIыщтэу артистхэм орэдхэр агъэ­жъынчых. Батмызэ ыгу ихъыкIырэр къыIотэным фэхьазы- рэп, ежь-ежьырэу зеубыжьы.

Мылъкуи, IэнатIи зиIэ цIыфыр режиссерым сценэм къыщегъэ­лъагъо. «Бизнесым пылъым зиубыжьэу зэхэпхыгъа?» зыфэпIощт упчIэр шъхьэм къехьэ. Режиссерым хэкIыпIэшIу къыгъотыгъэу тэлъытэ. Уигъэщхызэ, шIулъэгъу къабзэм, насыпым итамэ зэрэбгъэIорышIэщтым уакъыфещэ.

Сачнэт икIали артисткэ пшъа­шъэр шIу зэрилъэгъугъэм лIэ­ужхэр зэрипхыхэу тэлъытэ. ЗэрэхъурэмкIэ, Батмызэ иза­къоп артисткэхэм япсэлъыхъо­хэрэр. Сыд фэдэ шIыкIа къагъо­тырэр? Батмызэ хэщэтыкIы…

Артистхэу Хьакъуй Анзаур, Тхьэркъохъо Марджэнэт, Ахьмэт Артур, нэмыкIхэм ярольхэр къашIыхэзэ, студентхэр зы­щеджэхэрэр, зыщыпсэухэрэр, щыIэныгъэм чIыпIэу щыряIэр нахьышIоу зэбгъашIэхэ пшIоигъо охъу. КIэлэегъаджэу Марет ишIулъэгъу фэкIоным фэшI студенткэм щыIэныгъэм ролыр къыщишIи, IэпыIэгъу къызэрэ­фэхъугъэр пшысэм фэдгъадэрэп, щыIэныгъэм икуупIэ ухещэ, цIыфхэм язэфыщытыкIэхэр къегъэлъагъох.

Батмызэрэ Маретрэ шъхьэгъусэ зэрэзэфэхъугъэхэм искусствэм ыбзэ бай дэдэу зэ­рэщытыр къеушыхьаты. ШIу къыбдэхъунэу уфаемэ цIыфхэм уяупчIыным, ныбджэгъухэм уядэIуным, ор-орэу угупшы­сэным ямэхьанэ артистхэм къа­гъэлъэгъон алъэкIыгъ.

ЕплъыкIэхэр

— Спектаклым уегъэщхы, угу къеIэты, уегъэгупшысэ, — къы­тиIуагъ Къэзэнэ МулиIэт. —Сипшъэшъэгъухэр сигъусэхэу сеплъыгъ, артистхэм тафэраз. Театрэм джыри тыкъакIо тшIоигъоу тэкIожьы.

— ЯтIонэрэу къэгъэлъэгъоным сеплъыгъ, — къеIуатэ республикэ общественнэ движениеу «Адыгэ Хасэм» хэтэу, Урысыем, Адыгеим яза­служеннэ тренерэу Хъот Юныс. — Тиадыгабзэ нахьыбэрэ зэ­хэтхы тшIоигъу. Артистхэр гум рихьэу фэпагъэх. Спектаклыр щыIэныгъэм къыхэхыгъэу тэ­лъытэшъ, къалэу, къуаджэу ар зыщыхъугъэр къатшIэ тшIоигъоу тэ, театрэр зикIасэхэм, тызэупчIыжьы. Зичэзыу къэгъэ­лъэгъонхэм тяплъын тимурадэу тызэбгырэкIыжьы. Къэзыгъэзэжьырэр Тхьэм зэриштэжьырэр режиссерым дэгъоу къызэIуихыгъэу сэлъытэ.