Адыгеим и ЛIышъхьэу КъумпIыл Мурат къалэу Мыекъуапэ инароднэ депутатхэм я Совет изичэзыу сессие хэлэжьагъ. Къалэм имэрэу Геннадий Митрофановым къышIыгъэ отчетым ащ щедэIугъэх.

Илъэс къэс Iофэу ашIагъэр зыщызэфахьысыжьырэ псалъэм 2021-рэ илъэсымкIэ къалэм ипащэрэ муниципалитетым иад­министрациерэ яIофшIэн икIэух шъхьаIэхэр ащ къыщыриIотыкIыгъэх. Къэлэ казнэм ихахъо­хэр сомэ миллиардрэ миллион 750-м нэсыгъэх, зэхэубытагъэу хахъохэр сомэ миллиарди 4-м ехъугъэх. Бюджетым ихъардж­хэр процент 97-кIэ гъэцэкIагъэ хъугъэх ыкIи сомэ миллиарди 4-м нэсыгъапэхэп. 2020-рэ илъэсым елъытыгъэмэ, муниципальнэ чIыфэм сомэ миллион 54-кIэ къыкIичыгъ ыкIи сомэ миллион 971-м нэсыгъ.

Экономикэм ипромышленнэ сектор зэхъокIыныгъэшIоу фэ­хъу­гъэхэр ащ къыхигъэщыгъэх. Инвестиционнэ IофшIэным нахь зегъэушъомбгъугъэным анаIэ тырагъэты, предпринимательствэ цIыкIумрэ гурытымрэ Iэпы­Iэгъу афэхъух. ЕджапIэхэмрэ кIэлэцIыкIу IыгъыпIэхэмрэ яп­чъагъэ хагъахъо. УФ-м и Президент пшъэрылъэу къыгъэуцугъэхэм адиштэу еджапIэхэм яигъэкIотыгъэ гъэцэкIэжьын аублагъ. КадракIэхэр къызфэгъэфедэгъэнхэм, гъэсэныгъэм, медицинэм ыкIи культурэм ащылажьэхэрэм яшIэныгъэхэм ахэгъэхъогъэным япхыгъэ Iоф­тхьабзэхэр зэрахьэх.

ЦIыфхэр зычIэсыщтхэ унэхэм яшIын, сабыйхэр зэрыс унагъо­хэм IэпыIэгъу ятыгъэным, инфраструктурэм, гъогухэм яшIын анахь анаIэ зытырагъэтыхэрэм ащыщых. 2021-рэ илъэсым лъэпкъ проектэу «Щынэгъон­чъэу щыт гъогу дэгъухэр» зыфиIорэм тегъэпсыхьагъэу километрэ 12,3-рэ фэдиз зикIыхьэгъэ автомобиль гъогухэм яучасткэ 18 агъэцэкIэжьыгъ, зэпырыкIыпIи 10 зэтырагъэпсыхьагъ. Ахэм сомэ миллиони 193,3-рэ фэдиз апэIуагъэхьагъ.

Нэужым отчетым итегущыIэн фежьагъэх. Къэлэ Советым ифракцие пстэуми ацIэкIэ депутатхэм мэрием иIофшIэн еплъыкIэу фыряIэр къаIуагъ. Къыхагъэщыгъэхэм ащыщ еджа­пIэхэр зыщагъэцэкIэжьыщтхэ лъэхъаным кIэлэеджакIохэр нэмыкI учреждениехэм кIонхэ фаеу зэрэхъущтым къыхэкIэу транспорткIэ зэрэзэбгыращыщт­хэм иIоф тэрэзэу зэшIохы­гъэныр.

ЕплъыкIэу яIэхэм зядэIу нэужым республикэм и ЛIышъхьэ къыхигъэщыгъ пшъэдэкIыжь зыхьырэ ведомствэ пстэуми транспортым иIофыгъо изэшIохынкIэ муниципалитетым IэпыIэгъу фэхъунхэмкIэ пшъэ­рылъхэр зэрафашIыщтхэр.

Ащ нэужым газыр икъоу аIэкIэгъэхьэгъэным, къэралыгъо IэпыIэгъум хэгъэхъогъэным яп­хыгъэ программэхэм зэшIохыкIэу афэхъущтымкIэ Iофыгъоу къэуцухэрэм ягугъу къашIыгъ.

Муниципалитетым ихэхъоныгъэкIэ IофшIэнэу къапыщылъым илъэныкъо шъхьаIэхэр Адыгеим и ЛIышъхьэ къыгъэнэфагъэх. Ащ къызэриIуагъэмкIэ, мы аужырэ илъэсхэм республикэм икъэлэ шъхьаIэ исоциальнэ ыкIи иэкономикэ лъэныкъохэр на­хьышIу шIыгъэнхэмкIэ бэ зэшIуа­хыгъэр. А IофшIэныр джыри лъыгъэкIотэгъэн фае.

«Урысыем пэшIуекIорэ сан­кцие пхъашэхэр зыщыщыIэхэ лъэхъаным тиIофшIэн джыри нахь дэгъоу зэрэзэхэтщэщтым тыпылъын фае. Хэгъэгум экономикэмкIэ иIофхэм язытет псынкIэу зэхъокIыныгъэ фэхъу, а зэхъокIыныгъэхэм атегъэпсыхьагъэу тэри Iофхэр нахь псынкIэу дгъэцэкIэнхэ фае. Урысыем и Президентэу Владимир Путиным хэгъэгум и Правительствэ пшъэрылъ фишIыгъ экономикэмрэ соци­альнэ лъэныкъомрэ зэрарэу ахьын алъэкIыщтым нахь къы­кIегъэчыгъэным, цIыфхэм ящыIакIэ нахьышIу шIыгъэным апае зэкIэ фэлъэкIыщтыр ышIэнэу», — къыIуагъ Адыгэ Республикэм и ЛIышъхьэ.

Джащ фэдэу цIыфхэм апашъхьэ социальнэ пшъэрылъэу щытиIэхэр, анахьэу чIыпIэ зэжъу ифагъэхэм алъэныкъокIэ, икъоу дгъэцэкIэнхэм мэхьанэшхо иI. Нахьыпэм фэдэу джыри тынаIэ анахь лъэшэу зытедгъэтыхэрэм ащыщых ныхэмрэ кIэлэцIыкIу­хэмрэ къэухъумэгъэнхэр, кIэлэцIыкIухэр зэрыс унагъохэм IэпыIэгъу ятыгъэныр. КъумпIыл Мурат къызэрэхигъэщыгъэмкIэ, а IофшIэныр зэрэкIорэм ренэу ынаIэ тыригъэтыщт.

ЦIыфхэм нахь игъэкIотыгъэу агъэфедэрэ пкъыгъохэр, гъомылапхъэхэр, Iэзэгъу уцхэр ренэу щыIэнхэм ыкIи ахэм ауасэ хэмыхъоным тегъэпсыхьэгъэ Iофтхьабзэхэр зэшIохыгъэнхэ, ащ лъыплъэгъэн зэрэфаер рес­публикэм и ЛIышъхьэ джыри зэ агу къыгъэкIыжьыгъ.

«Лъэпкъ гухэлъхэу 2030-рэ илъэсым нэс пхырытщын фаеу щытхэм танэмысы, Iо­фы­шхоу республикэм щыкIорэр къызэтеуцо хъущтэп. Анахьэу тынаIэ зытетын фае­хэм ащыщых социальнэ инфраструктурэм зегъэушъом­бгъугъэныр ыкIи автомобиль гъогухэр гъэцэкIэжьыгъэнхэр. Экономикэм ылъэныкъокIэ — инвестициехэр нахьыбэу шъолъырым къызэрихьащтхэм ыкIи бизнесым IэпыIэгъу тызэрэфэхъущтым тадэлэжьэн фае», — къыхигъэщыгъ рес­публикэм и ЛIышъхьэ.

Псауныгъэм икъэухъумэн, гъэсэныгъэм, культурэм, спортым алъэныкъокIэ кадрэхэм ягъэхьазырынрэ яIэпэIэсэныгъэ хэгъэхъогъэнымрэ тынаIэ атедгъэтын фае.

ИкIэухым республикэм и ЛIышъхьэ муниципалитетым ипащэхэм, депутатхэм, къулыкъухэмрэ ведомствэхэмрэ яIофышIэхэм, зэкIэ къэлэдэсхэм зэрафэразэр къыIуагъ гуетыныгъэ ахэлъэу Iоф зэрашIэрэм, чIыпIэу тызэрытыр икъоу къызэрагурыIорэм ыкIи яшIуагъэ къызэрагъакIорэм апае.

АР-м и ЛIышъхьэ ипресс-къулыкъу.