Социальнэ-экономикэ IэпыIэгъу субъектхэм зэраратыщт шIыкIэм фэгъэхьыгъэ зэIукIэм Урысыем и Президентэу Владимир Путиныр къыщыгущыIэзэ, санкциехэм, нэмыкI пэрыохъухэм ямылъытыгъэу къэралыгъом ыпашъхьэ ит пшъэрылъхэр зэкIэ зэшIохыгъэнхэм анаIэ зэрэтырагъэтыщтыр хигъэунэфыкIыгъ.

Мы охътэ мыпсынкIэм предпринимательскэ сообществэм, компание зэфэшъхьафхэм, банкхэм ыкIи организациехэм, субъектхэм япащэхэм, нэмыкI къулыкъухэм шIуагъэ къытэу Iоф зэрашIэрэр, ащкIэ ахэм зэрафэразэр къэралыгъом ипащэ къыIуагъ. Ащ фэдэ екIо­лIакIэм экономикэм тапэкIи зыпкъитыныгъэ иIэнымкIэ, хэ­хъоныгъэ ышIынымкIэ амалышIухэр къеты.

Непэ шъолъырхэм анахьэу анаIэ зытырагъэтыщт лъэныкъо­хэм ямызакъоу, тапэкIи шIэ­гъэн фаехэм адэлэжьэгъэным мэхьанэшхо зэриIэр Владимир Путиным хигъэунэфыкIыгъ, ащкIэ пшъэрылъ гъэнэфагъэ къыгъэуцугъ.

Урысыем и Президент Указэу «УФ-м социальнэ-экономикэ зыпкъитыныгъэ илъынымкIэ, цIыфхэр къэухъумэгъэнхэмкIэ Iофтхьабзэхэм яхьылIагъ» зыфиIорэм кIэтхагъ, шъолъырхэм япащэхэм полномочие тедзэхэр ятыгъэнхэм ар фэгъэхьыгъ.

— Къиныгъоу, гумэкIыгъоу къытфыкъокIыхэрэм нахь лъэш ташIы, ахэр къызэрэзэтынэкIыщтхэми сицыхьэ телъ. Технологическэ ыкIи шIэныгъэ суверенитетыр дгъэпытэным тыпылъыщт, мэкъумэщ хъыз­мэтым, къыдэгъэкIыным, инфраструктурэм, псэупIэхэм яшIын, нэмыкI лъэныкъохэм хэхъоныгъэ ашIыным ахъщэ тедзэ пэIудгъэхьащт. Джащ фэдэу тицIыфхэм ящыIэкIэ-псэукIэ амалхэм къащымыкIэныр, социальнэ пшъэрылъхэр гъэцэкIэгъэнхэр анахь шъхьаIэх, — къыIуагъ къэралыгъом и Президент.

Владимир Путиным къызэрэхигъэщыгъэмкIэ, гъогухэм яшIын пэIуагъэхьащт ахъщэ тедзэ шъолъырхэм афатIупщыгъ. Ащ дакIоу мы илъэсым телъыта­гъэу инфраструктурэм епхыгъэ нэмыкI псэуалъэхэм ягъэпсын тефэщт ахъщэр нахьыбэ шIыгъэ­ным иIофыгъо хэплъэнэу УФ-м и Правительствэ пшъэрылъ фишIыгъ. Мыщ дэжьым шъо­лъыр бюджетхэм атегъэуагъэр нахьыбэ зэрэхъурэр къызэрагурыIо­рэр, ащ къыхэкIыкIэ ахэм IэпыIэгъу зэрафэхъущтхэр, джащ фэдэу 2030-рэ илъэсым нэс агъэцэкIэнэу агъэнэфэгъэ стратегическэ ыкIи лъэпкъ пшъэ­рылъхэр зэшIохыгъэнхэ зэрэфаер къэралыгъом ипащэ къы­Iуагъ.