Адыгэхэм шэнышIу зэрафэхъугъэу, ИлъэсыкIэ мэфэкIыр гъэтхапэм и 21-м игъэкIотыгъэу хагъэунэфыкIыгъ.

Республикэм культурэмкIэ и Министерствэ, Адыгеим лъэпкъ культурэмкIэ и Гупчэ, респуб­ликэ общественнэ движениеу «Адыгэ Хасэм» мэфэкIым фэгъэхьыгъэ Iофтхьабзэр зэха­щагъ.

Адыгеир къэралыгъо гъэпсыкIэ иIэу зыпсэурэр илъэси 100 мыгъэ мэхъу. 2022-рэ илъэсыр Урысыем щыпсэурэ лъэпкъхэм яискусствэрэ якультурнэ кIэнрэ я Илъэс. — МэфэкIхэр, культурэм ехьылIэгъэ Iофтхьабзэхэр республикэм щызэхащэхэзэ, Адыгеим щыпсэурэ лъэпкъхэм языкIыныгъэ мэпытэ, — къытиIуагъ рес­публикэм иобщественнэ движениеу «Адыгэ Хасэм» итхьаматэу ЛIымыщэкъо Рэмэзан.

Театрализованнэ мэфэкI зэхахьэм кIымафэмрэ гъатхэмрэ зэрэзэхэкIыжьыхэрэр, тыгъэу къепсырэм фэбагъэу къытфихьырэм гушхоныгъэ зэрэтигъэшIырэр, ом изытет чIыгулэжьхэм мэхьэнэ ин зэрэратырэр, нэмыкI лъэпкъ шэн-хабзэхэр къыщагъэлъэгъуагъэх. Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм иартистхэр, ансамблэхэу «Абрекхэр», «Мыекъуапэ инэфылъэхэр», «Майкопчанкэр», «Синдикэр», «Ащэмэзыр», орэдыIохэу Нэгъой Азэ, Даутэ Сусанэ, Еутых Вячеслав, нэмыкIхэри мэфэкI пчыхьэзэхахьэм хэлэжьагъэх.

Адыгэ Республикэм культурэмкIэ иминистрэ игуадзэу Кушъу Светланэ, къэзэкъхэм, къэндзалхэм, ермэлхэм яобщественнэ организациехэм ялIыкIохэр зэхахьэм къыщыгущыIагъэх.

Артистхэу Тхьаркъохъо Теуцожь, Хьакъуй Анзаур, Жъудэ Аскэрбый, Болэкъо Адам, нэмыкIхэм къашIыгъэ рольхэм театрализованнэ едзыгъо­хэр къагъэбаигъэх.

Лъэпкъ IэпэIасэхэу Гумэ Ларисэ, Цурмыт Рузанэ, Хьакъу­нэ Эльзэ, Гостэкъо Руслъан, ТIэшъу Нурбый, Боджэкъо Бэлэ, нэмыкI­хэм яIофшIагъэхэр къагъэлъэгъуагъэх. 2021-рэ илъэсым АдыгеимкIэ спортсмен анахь дэгъухэу Адыгэ Хасэм къыхихыгъэхэм афэгушIуагъэх, шIухьафтынхэр аратыжьыгъэх. Адыгэ орэдхэмкIэ, къашъохэмкIэ Илъэ­сыкIэ мэфэкI зэхахьэр аухыгъ.

2022-рэ илъэсыр илъэс мафэ тфэхъунэу зэкIэми тафэлъаIо. ЕмтIылъ Нурбый.