Урысыер экономикэм ылъэныкъокIэ къэралыгъо лъэшэу щыт. Къырым Урысыем къызыхэхьажьыгъэм щегъэжьагъэу тикъэралыгъо санкциехэр мымакIэу къытыралъхьагъэх, арэу щытми, а къиныгъохэр зэрифэшъуашэу къызэринэкIынхэ елъэкIы.

Шъолъырым ит предприятиехэм, мэкъумэщ хъызмэтым зыпкъитыныгъэ яIэу яIофшIэн лъагъэкIуатэ. Ащ нэмыкIэу цIыфхэм IофшIэпIэ чIыпIэхэр ашIомыкIодынхэм фэшI бизнесым хэщагъэхэм къэралыгъо IэпыIэгъу арагъэгъоты.

Адыгэ РеспубликэмкIэ зыпкъ итэу Iоф зышIэрэ предприятиехэм зэу ащыщ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мыекъопэ маши­нэшI заводыр». Мыгъэ ар загъэпсыгъэр илъэс 80 мэхъу. Мы уахътэм къыкIоцI ащ хэхъо­ныгъэхэр ышIыхэзэ ыпэкIэ лъы­­кIотагъ, ылъэ пытэу теуцуагъ. Гидравлическэ манипуляторхэм якъыдэгъэкIынкIэ Урысыем пэрытныгъэ щиIыгъ.

1942-рэ илъэсым къызэIуа­хыгъэ предприятием Хэгъэгу зэошхом илъэхъан зэуапIэм ищыкIэгъэ продукциер IэкIигъа­хьэщтыгъ. 1985-рэ илъэсым къыщыублагъэу мэз промышленнэ ыкIи чIыдэгъэгаз комплексхэм, псэолъэшIыным, мэкъумэщ хъызмэтым, экономикэм инэмыкI лъэныкъохэм ящыкIэгъэ гидроманипуляторхэм якъыдэгъэкIын зыфигъэзагъ. Заводыр хэушъхьафыкIыгъэ ыкIи дунэе къэгъэлъэгъонхэм, рек­ламнэ кампаниехэм чанэу зэрахэла­жьэрэм ишIуагъэкIэ, ащ къыдигъэкIырэ продукциер тыди щызэлъашIагъ, ахэр аужырэ шапхъэхэм адештэх. Ащ къыкIэ­лъыкIоу предприятием медаль ыкIи диплом пчъагъэ къыфагъэшъошагъ. 2000-рэ илъэсым къыщыублагъэу заводыр Урысые зэнэкъокъоу «Урысыем итовар анахь дэгъуи 100» зыфиIорэм пчъагъэрэ ифиналистэу ыкIи илауреатэу хъугъэ.

Предприятием къыдигъэкIырэр идэгъугъэкIэ нэмыкIхэм къахэщы, ар зыгъэ­федэхэрэм япчъагъи бэ.

— Мы мафэхэм зыпкъитыныгъэ тиIэу Iоф тэшIэ, — еIо заводым игенеральнэ пащэу ЕмтIылъ Руслъан. — ГущыIэм пае, 2021-рэ илъэсым иапэрэ мэзищ гидроманипулятор 60 фэдиз къыдэдгъэ­кIыгъ, мы илъэсым а пчъагъэр 165-рэ мэхъу. Предприятием иIофшIэн зыпари зэхъокIыныгъэ фэхъугъэп, зы нэбгыри IудгъэкIыгъэп, продукцием икъыдэгъэкIын проценти 100-м кIахьэ. ГумэкIыгъо закъоу непэ тиIэр IэкIыбым къыщыдагъэкIырэ гидрораспределителыр (Италием), ротарыр (Финляндием) ыкIи нэ­мыкI пкъыгъохэр къэтщэфынхэмкIэ пэрыохъу щыIэ зэрэхъугъэр ары. Джащ фэдэу инэу зэхэтшIагъ дгъэфедэрэ пкъыгъохэм, гъучIым, индустриальнэ дагъэм, нэмыкIыбэхэми ауасэ къазэрэхэхъуагъэр, ахэм ахэхьэ Урысыем къыщыдагъэ­кIыхэрэри. Ащ елъытыгъэу тэри типродукцие ыуасэ къэтIэтынэу итхъухьагъ. Мы къэбарым щызгъэгъозагъ АР-м эко­номикэ хэхъоныгъэмкIэ ыкIи сатыумкIэ иминистрэу З. Шэуджэныр. Джащ фэдэу гумэкIыгъор дэгъэзыжьыгъэ зэ­рэхъущтым епхыгъэу предложение къы­фэсхьыгъ. Пэрыохъухэр щыIэх нахь мышIэми, зыпкъ итэу заводым иIоф- шIэн лъегъэкIуатэ. ЦIыфхэм ялэжьапкIэ дгъэ­гужъорэп, игъом ятэты. БлэкIыгъэ илъэ­сым ар гурытымкIэ сомэ 44476-рэ хъущтыгъэмэ, мыгъэ сомэ 51690-м нэсыгъ.

ЕмтIылъ Руслъан къызэриIуагъэмкIэ, гумэкIыгъохэр щыIэхэми, агу агъэкIодырэп, къыдагъэкIырэр нахьыбэ ашIыным, ар IуагъэкIыным, ащ дакIоу заводым Iут цIыфхэм яфэIо-фашIэхэр зэрифэшъуашэу агъэцэкIэнхэм, агу къыдащэеным пылъых. Ахэм апае медицинэ кабинетхэм, шхапIэм Iоф ашIэ. Предприятием хэбзэIахьхэр етых, респуб­ликэм иэкономикэ хэхъоныгъэ ышIыным иIахьышIу хелъхьэ.

КIАРЭ Фатим.