Къырымрэ Севастопольрэ Урысыем къызыхэхьажьыгъэхэр илъэси 8 зэрэхъугъэр Адыгеим щыхагъэунэфыкIыгъ.

Мыщ фэгъэхьыгъэ мэфэкI зэхахьэу АР-м и Къэралыгъо филармоние щыкIуагъэм хэлэжьагъ Адыгэ Республикэм и ЛIышъхьэу КъумпIыл Мурат.

Джащ фэдэу Iофтхьабзэм хэлэжьагъэх Адыгеим и Къэралыгъо Совет — Хасэм и Тхьаматэу Владимир Нарожнэр, фе­деральнэ инспектор шъхьаIэу Сергей Дрокиныр, АР-м иминистрэхэм я Кабинет хэтхэр, республикэ парламентым идепутатхэр, нэмыкIхэри.

Адыгеим и ЛIышъхьэ къэзэрэугъоигъэхэм шIуфэс гущы­IэхэмкIэ закъыфигъазэзэ, илъэ­сийкIэ узэкIэIэбэжьмэ щы­Iэгъэ лъэпкъ референдумым изэ­фэхьысыжьхэм адиштэу Къырымрэ Севастопольрэ Урысыем къыхэхьажьынхэр ахэм ащы­псэурэ цIыфхэм игъоу зэралъэ­гъугъэр къыIуагъ.

— ЩыIакIэу яIэщтыр къыхахыным, лъэпкъыбэу исхэм якультурэ хэхъоныгъэ ашIын алъэкIыным ифитыныгъэ цIыф­хэм къыдахыгъ. А унашъом Урысыем дыригъэштагъ ыкIи Къырымрэ Севастопольрэ зыпкъ­итыныгъэ яIэнымкIэ, ахэм ящы­нэгъончъагъэ къэухъумэ­гъэным­кIэ кIочIэ шъхьаIэ хъугъэ. Зы къэралыгъо, зы лъэпкъ ты­хъу­жьыгъ ыкIи тызэгъусэу Уры­сыем инеущырэ мафэ тэгъэпсы, — къыIуагъ Адыгеим и ЛIышъхьэ.

КъумпIыл Мурат къызэриIуа­гъэмкIэ, Къырымрэ Севастопольрэ къэралыгъом исоциальнэ-экономическэ шъолъыр нахь псынкIэу хэщэгъэнхэмкIэ Урысыем и Президентрэ Правительствэмрэ Iофышхо ашIагъ.

— Илъэсиим къыкIоцI Урысыем зэпымыоу къытеIункIагъэх. Ау ащ къымыгъащтэу, гу­мэкIыгъохэр зэшIохыгъэнхэм фытегъэпсыхьэгъэ унашъохэр къыкIэлъыкIуагъэх, тикъэралыгъо ыпэкIэ лъыкIуатэзэ, цIыф лъэпкъхэм языкIыныгъэ ыгъэпытагъ. Урысыем иIэпыIэгъу Донбасс щыпсэухэрэми ящы­кIагъ. Ахэм янахьыбэм урысыбзэр яныдэлъфыбз. 2014-рэ илъэсым Украинэм къыщыхъугъэ хъугъэ-шIагъэхэм ауж цIыф­хэм радикальнэ националистхэм защаухъумэн фаеу хъугъэ. Мы илъэсиим народнэ республи­кэхэм яIофхэр къиныгъэ, мамыр цIыфхэм ренэу къящэрыощтыгъэх, — къыIуагъ респуб­ликэм ипащэ.

Урысыер Донбасс ицIыфхэм агоуцуагъ ыкIи республикитIум ясуверенитет дыригъэштагъ ыкIи ахэр къыухъумэнхэу ыпшъэ рилъхьажьыгъ.

— Урысыем и Президентэу Владимир Путиным къызэрэ­хигъэщыгъэмкIэ, тишIоигъоныгъэхэр къызэрэтыухъумэщтхэм дакIоу, тикъэралыгъо къызэ­рэ­нэжьыщтым ылъэныкъокIи щынагъо къэуцугъагъ. Ащ къы­хэ­кIыкIэ непэ Iофхэм язытет елъытыгъэу къэралыгъом ­ипащэ унэшъо къин ышIыгъ, ау мыщ дэжьым нэмыкI хэкIыпIэ щы­Iагъэп. Урысыем щыпсэухэ­рэм янахьыбэм Президентым ды­рагъэштагъ. УФ-м зыухъу­мэ­жьы­нымкIэ и Министерствэ пшъэ­рылъэу ыпашъхьэ щытхэр псын­кIэу ыгъэцэкIэнхэм, Донбассрэ Украинэмрэ мамыр щы­IакIэм къыфагъэзэжьыным тыщэгугъы, — къыIуагъ КъумпIыл Мурат.

Непэ тызэгъусэу, зыкIыныгъэ тазыфагу илъэу ыпэкIэ ты­лъыкIуатэмэ, гумэкIыгъохэр, къиныгъохэр зэкIэ къызэты­нэкIынхэ зэрэтлъэкIыщтыр рес­публикэм ипащэ хигъэунэфыкIыгъ.

— Шъолъырым ыпашъхьэ ит пшъэрылъхэр зэшIохыгъэнхэм, цIыфхэм тишIуагъэ ядгъэкIыным тыпылъыщт. Тикъэралыгъо, тиреспубликэ хэхъоныгъэ ашIызэ ыпэкIэ лъэрэкIуатэх, лъэпкъ зыкIыныгъэр нахь орэпыт, — къыIуагъ АР-м и ЛIы­шъхьэ.

МэфэкIымкIэ Адыгеим щы­псэухэрэм къафэгушIуагъэх Адыгеим и Къэралыгъо Совет — Хасэм и Тхьаматэу Владимир Нарожнэр, Адыгеим иветеранхэм я Совет итхьаматэу Къоджэ Аслъан, паралимпийскэ чемпио­нэу Валерий Пономаренкэр.

Республикэм итворческэ купхэм ыкIи искусствэм илIыкIохэм къагъэхьазырыгъэ концертымкIэ Iофтхьабзэр зэфа­шIыжьыгъ.

Адыгеим и ЛIышъхьэ ипресс-къулыкъу Сурэтхэр А. Гусевым тыри­хыгъэх.