Мы Iофтхьабзэм хэлэжьагъэх Адыгэ Республикэм культурэмкIэ иминистрэу Аулъэ Юрэ, Адыгэ Республикэм и Къэралыгъо Совет — Хасэм социальнэ политикэмкIэ, унагъом иIоф­хэмкIэ, псауныгъэр къэухъу­мэгъэнымкIэ ыкIи культурэмкIэ и Комитет итхьаматэу Наталья Широковар, Адыгэ Республикэм и Къэралыгъо Совет —Хасэм гъэсэныгъэмкIэ и Комитет итхьаматэу Шэуджэн Тембот, искусствэм иIофышIэхэр, культурэм иучреждениехэм, театрэхэм, училищхэм, искус­ст­вэхэмкIэ кIэлэцIыкIу еджапIэхэм ыкIи творческэ союзхэм япащэхэр.

Iофыгъо шъхьаIэу зэхэсыгъом зыщытегущыIагъэхэр культурэмкIэ кадрэхэм ягъэхьазырын ары зэпхыгъагъэр.

ЗэIукIэгъур къызэIуихызэ рес­публикэм и ЛIышъхьэ къызэрэхигъэщыгъэмкIэ, тихэгъэгу къешIэкIыгъэ гумэкIыгъохэр щыIэхэ нахь мышIэми, Урысыем и Президентэу Вла­димир Путиным шъолъырхэм апашъхьэ пшъэрылъэу къыщигъэуцугъэр тапэкIэ рахъухьэ­гъэ­гъэ проектхэр зэкIэ пхырыщыгъэнхэр гъэцэкIэгъэныр ары.

«Къэралыгъом ипащэ къызэрэхигъэщырэмкIэ, 2030-рэ илъэсым нэс къызэлъаубытырэ стратегическэ, лъэпкъ гухэлъ пстэуми танэсын, цIыфхэм яфе­дэ зыхэлъ гъэхъагъэхэр тшIынхэ фае. Ар шъолъырхэм, Адыгеи­ри зэрахэтэу, ащыкIорэ IофшIэнышхом илъэныкъо пэпчъ фэгъэхьыгъ. Культурэм хэхъоныгъэ егъэшIыгъэныр а пшъэрылъхэм зыкIэ ащыщ.

Ковидым зызщиушъомбгъугъэ лъэхъаным анахьэу ар цIыфхэм зэхашIагъ, къэралы­гъоми игъэ­кIотыгъэ IэпыIэгъу ащ ритын фаеу пшъэрылъ къэу­цугъ», — къыIуагъ КъумпIыл Мурат.

Инфраструктурэр нахьышIу шIыгъэнымкIэ, культурэм епхыгъэ Iофтхьабзэхэм зягъэушъомбгъугъэнымкIэ IофшIэнышхоу пандемием ыпэкIэ рагъэжьэ­гъагъэр къызэрэзэтемыуцуа­гъэр хагъэунэфыкIыгъ. Къэралыгъо программэхэмрэ лъэпкъ проектэу «Культурэмрэ» атегъэ­псыхьагъэу зэкIэ агъэнэфэгъэ Iофтхьабзэхэр агъэцэкIагъэх. ГущыIэм пае, илъэсищым къыкIоцI культурэм и Унэу 31-рэ агъэцэкIэжьыгъ, кIэу 4 ашIыгъ, искусствэхэмкIэ кIэлэцIыкIу еджэпIи 7, къэралыгъо учреждении 2 ыкIи гъэсэныгъэ зы­щарагъэгъотырэ организациехэр агъэцэкIэжьыгъэх, мобильнэ тхылъеджэпIи 10 къызэIуа­хыгъ. Проектэу «Культура малой Родины» зыфиIоу «Единэ Россиер» кIэщакIо зыфэхъугъэм диштэу культурэм иунэхэу къуа­джэхэм адэтхэм яматериальнэ-техникэ лъапсэ агъэкIэ­жьыгъ. Мы илъэсым культурэм и Уни 3 ыухыщт, культурэм иуни 9, искусствэхэмкIэ кIэлэцIыкIу еджэпIи 2 агъэцэкIэжьыщт.

Анахьэу республикэм и ЛIы­шъхьэ ынаIэ зытыридзагъэр мы лъэныкъомкIэ кадрэ Iофыгъохэм язэшIохын. Музейхэм, театрэ­хэм, тхылъеджапIэхэм, культу­рэм иучреждениехэм IэпэIэсэныгъэ ин зыхэлъ IофышIэхэу ащылэжьэн зылъэкIыщтхэм япчъагъэ нахьыбэ шIыгъэн фае. Культурэм иIофышIэхэм пан­демием илъэхъан IофшIэкIэ ама­лэу къызфагъэфедагъэхэм къапкъырыкIыхэзэ джырэ технологиехэм, инновациехэм зэ­рафэхьазырыщтхэм анаIэ тырамыгъэт хъущтэп.

Цифрэ шIыкIэм фэгъэхьыгъэу къэгущыIэ зэхъум республикэм и ЛIышъхьэ къызэриIуагъэмкIэ, ащ амалыкIэхэр культурэм епхыгъэу къызэIуехых. Онлайн­технологиехэм яшIуагъэкIэ цIыф­х+эм зэпхыныгъэ адыряIэн алъэкIы, шъолъыр пэпчъ, лъэпкъ пэпчъ икультурэ кIэн нахь псынкIэу нэмыкIхэм алъы­гъэIэсыгъэным иамал къаты. Лъэпкъ проектэу «Культурэм» ишIуа­гъэ къэкIощт джырэ тех­ноло­гиехэр мыщ щыгъэфедэ­гъэн­хэмкIэ.

«Тэ нахьыпэм фэдэу пшъэ­рылъэу тиIэр къэнэжьы — цIыф­хэм ятворческэ амалхэр пхырыщыгъэнхэмкIэ зыфэдэ къэмыхъугъэ культурнэ кIэныр къэу­хъумэгъэнымкIэ ящыкIа- гъэр зэкIэ Адыгеим щягъэгъотыгъэныр ары», — къыIуагъ КъумпIыл Мурат.

Адыгэ Республикэм культу­рэмкIэ иминистрэу Аулъэ Юрэ непэкIэ Iофхэм язытет фэгъэ­хьыгъэ доклад къышIыгъ. Ащ къызэрэхигъэщыгъэмкIэ, илъэсэу икIыгъэм лъэпкъ проектэу «Культурэм» тегъэпсыхьагъэу Урысыем иапшъэрэ еджэпIэ 14-мэ нэбгыри 170-рэ аще­джагъ. Информационнэ технологиехэм алъэныкъокIэ специалистхэм якъыхэхын епхыгъэ IофшIэныр макIо. Нафэ къызэ­рэхъугъэмкIэ, кадрэ ныб­жьы­кIэхэр: музыкальнэ дис­цип-­ли­нэхэмкIэ езыгъэджэщтхэр, орэ­­дыIохэр, хормейстерхэр, хореографхэр ыкIи нэмыкIхэр икъухэрэп. Кадрэхэм ягъэхьазырын епхыгъэ IофшIэныр лъи­гъэкIотэщт.

ЗэIукIэгъум икIэухым IэпэIэсэныгъэ зыхэлъ ныбжьыкIэхэм IэпыIэгъу ятыгъэным, Урысыем иапшъэрэ еджапIэхэм чIыпIэхэр ахэм къащыфыхэгъэ­кIыгъэнхэм, специалист ныбжьыкIэхэм грантхэр ятыгъэнхэм япхыгъэ IофыгъохэмкIэ яеплъы­кIэхэр къаIуагъ.

КъумпIыл Мурат АР-м культурэмкIэ иминистрэ пшъэрылъ фишIыгъ игъоу алъэгъугъэхэр зэкIэ къыдилъытэнхэу, лъэпкъ проектым, федеральнэ ыкIи шъолъыр программэхэм яамал­хэм къапкъырыкIыхэзэ Iофы-гъоу къэуцугъэр тэрэзэу зэхэфыгъэным дэлэжьэнэу.

АР-м и ЛIышъхьэ ипресс-къулыкъу Сурэтхэр А. Гусевым тырихыгъэх.