Адыгэ Республикэм и ЛIышъхьэ и УказкIэ Наталья Агеевар кIэлэцIыкIум ифитыныгъэхэм якъэухъумэнкIэ Адыгэ Республикэм и Уполномоченнэу агъэнэфагъ. Республикэм ипащэу КъумпIыл Мурат Адыгэ Республикэм и Пра­вительствэ зычIэт унэм ащ зэIукIэгъу щыдыриIагъ.

Республикэм и ЛIы­шъхьэ сабыитф зиIэ, тренерэу Iоф зышIэрэ Наталья Агеевам IэнэтIакIэ зэрэIуагъэхьагъэмкIэ фэгушIуагъ. Агеевхэм яунагъо исхэр спорт ориентированием зэрэпылъхэм имызакъоу гъэсэныгъэ тедзэ ягъэгъотыгъэнымкIэ Адыгэ Республикэм и Гупчэ къекIуалIэхэрэри спортым хащэх.

Адыгеим и ЛIышъхьэ къызэрэхигъэщыгъэмкIэ, Наталья Агеевам опытышIу зэриIэм, иIофшIэн хэшIыкI дэгъу зэрэфыриIэм яшIуагъэкIэ кIэлэцIыкIум ифитыныгъэхэм якъэухъумэнкIэ Уполномоченнэ IэнатIэр дэгъоу ыгъэцэкIэн, нэмыкI унагъохэми, кIэлэцIыкIухэми яфедэхэр къыгъэгъунэнхэ ылъэкIыщт.

КъумпIыл Мурат Уполномоченнэм иIофшIэн мэ­хьанэшхо зэриIэр хи­гъэунэфыкIыгъ, кIэлэцыкIухэм яфитыныгъэхэмрэ яфедэхэмрэ якъэухъумэн­кIэ пшъэрылъ шъхьаIэхэр къыгъэнэфагъэх. Анахьэу ащ къыхиубытэхэрэр гъэсэныгъэ зэригъэгъоты­нымкIэ, медицинэ фэIо-фашIэхэр къыфагъэцэ­кIэнхэмкIэ сабыим фитыныгъэу иIэр амыукъоныр, сабый ибэхэмрэ ны-тыхэр зышъхьарымытыжь кIэлэцIыкIухэмрэ яфитыныгъэ­хэр къэухъумэгъэнхэр ары. КIэлэцIыкIухэм пра­вэм ылъэныкъокIэ шIэныгъэ икъу ягъэгъотыгъэнри мэхьанэшхо зиIэ лъэныкъохэм зыкIэ ащыщ.

«Анахь шъхьаIэр кIэлэцIыкIу пэпчъ анаIэ тырагъэтыныр ары. Сэкъатныгъэ зиIэ кIэлэцIыкIухэр, сабыибэ зэрыс унагъохэм IэпыIэгъу ягъэгъотыгъэныр УФ-м и Президентэу Владимир Путиным Федеральнэ ЗэIукIэм фигъэхьыгъэ Тхыгъэм къыщигъэнэфэгъэ къэралыгъо политикэм изы лъэныкъо шъхьаIэхэм ащыщ. Владимир Путиным бэмышIэу шъолъырхэм япащэхэм адыриIэгъэ зэ­IукIэм социальнэ пшъэ­рылъхэр икъоу агъэцэкIэнхэу игъо ащыфилъэгъугъ. Тэри республикэм мы Iофым лъэшэу тынаIэ щы­тедгъэтыщт, цIыфхэр кризисым къызэрэхэтщы­жьыщтхэ амалыкIэхэр дгъэфедэщтых. Джащ фэдэу проектхэу, социальнэ программэхэу аублагъэхэр зэкIэ агъэцэкIэнхэм гъунэ лъытфыщт», — къыIуагъ КъумпIыл Мурат.

Республикэм ипащэ Наталья Агеевам ынаIэ тырыригъэдзагъ тхьаусыхэ тхылъэу къыIэкIахьэхэрэм икъоу ахэплъэнэу. Уполномоченнэм хэбзэ къулыкъухэм, прокуратурэм, чIыпIэ зыгъэIорышIэжьынымкIэ къулыкъухэм, общественнэ организациехэм нахь тэрэзэу Iоф адишIэнэу игъо филъэ­гъугъ.

Сабыим ифитыныгъэ­хэмкIэ Адыгэ Республикэм и Уполномоченнэ республикэм и ЛIышъхьэ цыхьэ къызэрэфишIыгъэмкIэ зэрэфэразэр, кIэлэцIыкIухэм яфитыныгъэ­хэмрэ яфедэхэмрэ якъэу­хъумэн кIуачIэу иIэр зэ­рэрихьылIэщтыр риIуагъ.

Агеева Наталья Александр ыпхъур 1976-рэ илъэсым Мыекъопэ районымкIэ поселкэу Каменномостскэм къыщыхъугъ. Мыекъопэ къэралыгъо технологическэ институтыр къыухыгъ, тренерэу, кIэлэцIыкIухэм гъэсэныгъэ тедзэ ягъэгъотыгъэнымкIэ Адыгэ Республикэм и Гупчэ икIэлэегъаджэу Iоф ышIагъ. Дипломэу «Материнская слава» зыфиIо- рэр, Адыгэ Республикэм физическэ культурэмрэ спортымрэкIэ и Комитет и Щытхъу тхылъ къыфа­гъэшъошагъэх, сабыитфмэ ян.

Адыгэ Республикэм и ЛIышъхьэ ипресс-къулыкъу Сурэтыр А. Гусевым тырихыгъ.