Гъэтхапэм и 17-м АР-м и Къэралыгъо Совет — Хасэр зызэхащагъэр илъэс 30 зэрэхъурэр хигъэунэфыкIыгъ.

Республикэм Парламент иIэным къежьапIэу фэхъугъэм, нэужым зэхъокIыныгъэу ащ фашIыгъэхэм, непэ иIофшIэн зэрэзэхищэрэм афэгъэхьыгъэ «Iэнэ хъурае» а мафэм зэхащэгъагъ. Мыекъопэ къэралыгъо технологическэ университетыр зычIэт унэм ар щыкIуагъ.

Iофтхьабзэм хэлэжьагъэх АР-м и Къэралыгъо Совет —Хасэм идепутатыгъэу, АР-м и ЛIышъхьэ IанатIэ пIэлъитIурэ Iутыгъэу, непэ и Къэралыгъо упчIэжьэгъоу ТхьакIущынэ Ас­лъан, Адыгеим и Апшъэрэ Со­вет, ары хэбзэихъухьэ органым ыцIагъэр, иапэрэ зэIугъэкIэгъу и Тхьамэтагъэу ЛIыIужъу Адам, къыкIэлъыкIогъэ зэIугъэкIэгъу­хэм япэщагъэхэм ащыщхэр, непэ Парламентым идепутатхэр, муниципальнэ образова­ниехэм янароднэ депутатхэм ясоветхэм ятхьаматэхэр, шIэныгъэлэжьхэр, нэмыкIхэр.

Зэхэсыгъор зэрищагъ Къэралыгъо Советым — Хасэм и Тхьаматэу Владимир Нарожнэм. ШIуфэс псалъэу ащ къы­шIыгъэм илъэс 30-р хэбзэ­ихъухьэ органымкIэ мыбэшхоми, зигугъу пшIын IофшIагъэ, опыт иIэ зэ­рэхъугъэр къыщыхигъэщыгъ.

— Адыгэхэм япарламен­тариз­мэ лIэшIэгъу пчъагъэ ыныбжь, — къыIуагъ Владимир Нарожнэм. — Нахьыпэм щыIэныгъэм Iофыгъоу къыздихьырэр зэкIэ Хасэм щызэхафыщтыгъ, хэкIыпIэ къыщыфагъотыщтыгъ, лъы­тэныгъэшхо зыфашIырэ цIыф Iушхэр хэтыщтыгъэх. Непэрэ Парламентыр цIыфхэм яфитыныгъэхэм ыкIи яшъхьафитныгъэ, лъэпкъэу шъолъырым исхэм яныдэлъфыбзэ, якультурэ хэ­хъоныгъэхэр ашIынхэм, социальнэ-политическэ зыпкъитыныгъэм, АР-м икъэралыгъо ха­бзэ иIофшIэн шIуагъэ къытэу зэхищэным алъапс.

Илъэсхэм зэхъокIыныгъэу Парламентым иIофшIэн фэхъугъэхэми ащ и Тхьаматэ ягугъу къышIыгъ. А уахътэм закони­хъу­хьэ орган шъхьаIэм хэтыщтхэм яхэдзынхэм язэхэщэн ыкIи ар зэрэзэтеутыгъэщтым апылъ шап­хъэхэр зэхъокIыгъэ хъугъэх, палатитIур зы ашIы­жьыгъ, мандатхэм япчъагъэ зэрахъокIыгъ, округхэмкIэ ыкIи партийнэ спискэхэмкIэ депу­татхэр хадзых.

Нэужым къэгущыIагъэх Тхьа­кIущынэ Аслъан, ЛIыIужъу Адам, нэмыкIхэр. Адыгэ автоном хэкур РСФСР-м и Советскэ Со­циалистическэ Республикэ зэрэхъужьыгъэм къежьапIэу фэ­хъугъагъэр, ащ и Апшъэрэ Совет апэрэ зэхэсыгъор зэри­Iагъэр, Адыгеим игерб, игимн ыкIи икъэралыгъо быракъ зы­фэдэщтхэр зэрагъэнэфэгъа­гъэхэр, Конституцием мэзи­тфырэ тегущыIэхи зэраштэгъагъэр, нэмыкIыби ахэм агу къа­гъэкIыжьыгъ.

Джащ фэдэу Законихъухьэхэм я Советэу, НыбжьыкIэхэм япарламентэу Къэралыгъо Советым — Хасэм щызэхащагъэ­хэм мэхьанэу яIэм, Iофэу ахэм ашIэ­рэм атегущыIагъэх, яеплъы­кIэхэр къыраIотыкIыгъ.

ХЪУТ Нэфсэт.