Адыгэ Республикэм и ЛIышъхьэу КъумпIыл Мурат пшъэрылъ зэрафишIыгъэм тетэу уасэ­хэм якъызэтеIэжэнкIэ Iофтхьэбзэ гъэнэ­фагъэхэр республикэм щызэрахьэх. Ахэм ахэхьэ ермэлыкъхэм язэхэщэн.

Бэдзэр уасэхэм анахьи нахь пыутэу ахэм гъомылапхъэхэр ащащэх. Уасэхэр къаIэты зэ­рэмыхъущтыр предпринимательхэм агурагъаIо. Адыгэ Республикэм и ЛIы­шъхьэ пшъэрылъ къыгъэуцугъ муниципалитет пэпчъ ермэ­лыкъхэр цIыфхэм ащафызэ­хащэнхэу, уасэхэр къамыIэ­тыным гъунэ лъафынэу, на­хьыбэрэ ермэлыкъхэр Мые­къуапэ щыIэнхэу.

Ащ къыдыхэлъытагъэу, шэмбэтым ыкIи тхьаумафэм, гъэтхапэм и 19 — 20-м, респуб­ликэм икъэлэ шъхьаIэ ермэлыкъхэр щыкIощтых. ЩэпIэ сатырхэм лым, щэм, хьаджыгъэм ахэшIыкIыгъэ гъомы­лапхъэхэр, хэтэрыкIхэр, нэ­мыкIхэри ателъыщтых.

Мыекъопэ къэлэ администрацием ипресс-къулыкъу къызэритыгъэмкIэ, шэмбэт ма­фэм ермэлыкъхэр чIыпIи­тIумэ ащызэхэщэгъэщтых: ура­мэу Советскэм (урамэу Победэм къыщегъэжьагъэу пе­реулкэу Красноармейскэм нэс); урамэу Димитровым ыцIэ зыхьырэм (Чкаловымрэ Юннатхэм яурамрэ азыфагу).

Тхьаумэфэ мафэм къэлэ гупчэм ермэлыкъ щыIэщт (ура­мэу Советскэм).

Пчэдыжьым сыхьатыр 7-м къыщегъэжьагъэу мафэм сы­хьатыр 2-м нэс ермэлыкъхэр зэхэтыщтых.

Экономикэр чIыпIэ къин зыщит лъэхъаным Мыекъуапэ дэсхэмкIэ ермэлыкъхэр Iэ­рыфэгъу хъущтых, нахь пыутэу гъомылапхъэхэр къащэфын алъэкIыщт.