IэкIыб къэралыгъохэм къаращыжьыщтых
Къэралыгъо зэфэшъхьафхэм цIыфхэр зыщэщтыгъэхэ къухьэлъатэхэм яIофшIэн охътэ гъэнэфагъэ имыIэу зэпагъэугъ. Турхэр зыщэфыгъахэхэми, зыгъэпсэфакIо кIогъахэхэми яIофхэр къэхьылъагъэх.
Украинэм щыхъурэм къыхэкIэу КъохьапIэм ыкIи фэшъхьаф лъэныкъохэм ащыIэ къэралыгъуабэмэ яошъогу гъогухэр зэфашIыгъэх.
ТыдэкIи зекIон Iофыгъохэм ягъэцэкIэн хэпшIыкIэу къыщызэтеуцуагъ. Короновирусым зыкъызеIэтыми къэралыгъо гъунапкъэхэр зэфэзышIыгъагъэхэр къахэкIыгъэх, ау вакцинэ зэрэзыхябгъэлъхьагъэр къэзыушыхьатырэ тхылъыр уиIэмэ нахьыбэмэ уарыхьан плъэкIыщтыгъ. Джы Урысыем къэралыгъо санкциехэр къызытыралъхьагъэхэм къыщегъэжьагъэу IэкIыб хэгъэгухэм къарынагъэхэу, къызэрэкIожьынхэ транспорт щымыIэхэм япчъагъэ нэбгырэ мин 200 фэдиз мэхъу.
Ростуризмэри, Урысыем итуроператорхэм я Ассоциации, Росавиациери хэкIыпIэхэм алъэхъух. Турхэр зыщащэфыгъэ туроператорхэм цIыфхэм закъыфагъэзэнхэу къяджэх, занкIэу къэмыкIожьышъущтхэмэ, къухьэлъатэхэр джыри зыдэбыбынхэ фит къэралыгъохэр къафыхахых.
Гъэтхапэр къызысыгъэм къыщыублагъэу США-м иошъогу рейсхэр зэфишIыгъэх. Ащ тицIыфхэр Мексикэм, Кубэ, Венесуэлэ къарыкIыжьынхэмкIэ изэрар къэкIуагъ. Джы а хэгъэгухэм закъыщаплъыхьанэу кIо зышIоигъохэм турхэр арамыщэнхэу Ростуризмэм унашъо ышIыгъ.
Игъэпсэфыгъо уахътэ зыухыгъэхэу, къэзыгъэзэжьынэу амал зимыIэхэм ащыщхэр зэпхыгъэхэ туроператорхэм яахъщэкIэ хьакIэщхэм арызыгъэсыхэрэри щыIэх. Бэмэ ахъщэ лыеу зыдырахьыжьагъэр аухыгъ, зикарточкэ илъхэми къырахын алъэкIырэп. Картэхэу «Виза», «Мастеркард» зыфиIо— хэу Урысыем къыщыдагъэкIыгъэхэр гъэтхапэм и 10-м къыщегъэжьагъэу IэкIыб хэгъэгухэм ащагъэфедэнхэ алъэIырэп.
ТицIыфхэр IэкIыб къэралыгъохэм къаращыжьыщтых. Яшъыпкъэу Iофым пылъых, амалэу щыIэхэм алъэхъух. Ростуризмэм мафэ къэс Iофхэм язытет цIыфэу къяжэхэрэм агурегъаIо. Мы мафэхэм ахэр къухьэлъатэхэмкIэ Азербайджан, Армением, Белоруссием, Казахстан, Узбекистан ыкIи Тыркуем къэкIожьынхэ алъэкIыщт.