Кэшбэкыр зыщыбгъэфедэн плъэкIыщт уахътэр нахьыжьэу, гъэтхапэм, зэпагъэужьыгъ. Турхэр зыщэфыгъэхэм ахэм алъатыгъэ ахъщэм щыщэу процент 20 зырыз къаратыжьыгъах.

Ростуризмэм ипащэу Зарина Догузовам къызэриIуа­гъэмкIэ, цIыфхэм сомэ миллиард 12 фэдиз путевкэхэм алъатыгъ. Ащ щыщэу сомэ миллиардитIурэ ныкъорэ зыгъэпсэфакIохэм къаIэкIэхьажьыгъ.

Туркэшбэкыр цIыфхэм агу зэрэрихьырэр джыри нафэ къэхъугъ. Тур зэфэшъхьафхэр зыщэфы зышIоигъо пстэумэ ар къадэхъугъэп. Арэу щытми, хьакIэщхэм гъэтхапэм къащыуцущтыгъэ зекIохэм япчъагъэ джыри къыхэхъуагъ. Нэбгырэ мин 200 фэдизмэ аужырэ лъэхъаным кэшбэкыр къызфагъэфедагъ.

Кэшбэкыр зигъусэ путевкэхэр джыри цIыфхэм аращэным зэрэпадзэжьыщтыр З. Догузовам къыIуагъ. Хэгъэгу кIоцI зекIоным нахь зырагъэушъомбгъуным фэшI гъэтхапэм и 15-м къыщегъэжьагъэу жъоныгъуакIэм и 1-м нэс тур зэфэшъхьафхэр зыгъэпсэфакIохэм къы­хахынхэ амал аратыщт.

ЦIыфхэм агъэцэкIэн фаеу программэм къыдилъытэщтыгъэ лъэныкъохэр зэхъокIыгъэхэп. Ащ Урысыем ишъолъырхэр зэкIэ хэлажьэх. Турым ыуасэ карточкэу «Мирым» илъ ахъщэм хэкIын фае. Кэшбэкым мэфи­тфыкIэ къегъэзэжьы, ар къыуатыжьыным пае уздэкIорэ зыгъэпсэфыпIэм чэщитIум нахь мымакIэу щипхынэу щыт. Хэти зэрэфаем фэдизрэ путевкэ ыщэфын фит, путевкэ пэпчъ кэшбэкыр игъусэщт.