Тызыхэт уахътэр гумэкIыгъоми, Урысыем и Къыблэ шъолъыр изыгъэпсэфыпIэхэм яIофшIэн зэпагъэурэп, хьакIэу къафакIохэрэм япчъагъи къыщыкIэрэп.

Кавказым зыщызы­гъэпсэфынэу къакIо­хэрэм япчъагъэ проценти 150-м нэсыгъ. Ростуризмэм зэрэхигъэунэфыкIырэмкIэ ахэм джыри къа­хэхъощт.

Компаниеу «Курорты Северного Кавказа» зыфаIорэм аужырэ илъэ­ситIум къеуалIэ­хэрэм процент 85-рэ фэдиз къахэхъуагъ. Домбай, Архыз, Тебердинскэ заповедникым, туркомплексэу «Медовые водопады» зыфиIохэрэм защагъэпсэфыныр цIыфхэм якIас.

Адыгэ Республикэм хьакIэу къакIохэрэми илъэс къэс къа­хэхъо. Лэгъо-Накъэ, Гъозэрыплъэ, псыкъефэххэр, Кавказ заповедникыр ашIогъэшIэгъоных. ЗекIо маршрут зэфэшъхьафхэм нэIуасэ зафашIы, тичIыопс ибаиныгъэ зэрагъэлъэгъу.

Гъэмафэр къызысыкIи Урысыем и Къыблэ цIыфхэм зы­къагъэзэщт. Мыщ щыгъэпсыгъэ инфраструктурэр илъэс псаум зэпымыоу агъэфедэ. ХьакIэщ номерхэр пэшIорыгъэшъэу зыштагъэхэр кIэгъожьхэрэп, яуахътэ къызысыкIэ ахэр къызэряжэхэрэр ашIэзэ къякIуалIэх.

Къыблэ лъэныкъом зыщызыгъэпсэфыхэрэм къухьэлъатэхэмкIэ къалэхэу Шъачэ, Волгоград, Минводы, Ставрополь яаэропортхэм анэсынхэу амал яI. Къэнэрэ гъогууанэр автобусхэмкIэ е мэшIокухэмкIэ акIужьын алъэкIыщт.

Тигъунэгъу Краснодар краим иинфраструктурэ нахь зэрэзэтегъэпсыхьагъэм къыхэкIэу зыгъэпсэфакIохэм якъэкIон гъэмафи кIымафи зэпыурэп.

Росавиациер зекIо кIохэрэм IэпыIэгъу афэхъуным пылъ. Мары Москва уикIэу авиакомпаниеу «Ямал» зыфаIорэм икъухьэлъатэхэмкIэ узэрэбыбышъущтыр къыхагъэщыгъ. Турагентствэхэм письмэхэр афарагъэхьыхэу рагъэжьагъ. Гъэтхапэм и 18-м къыщегъэжьагъэу Тыркуем иавиакомпаниеу «Буэнос-Айресым» икъухьэлъа­тэхэмкIэ цIыфхэр зэращэхэу рагъэжьэжьыщт. Тыркуер нэбгырэ мини 10-м къыщымыкIэу тицIыфхэр аригъэщэнхэм фэ­хьазыр.

Египет икъухьэлъатэхэр быбыхэрэп, ау лъэныкъуитIури зыгъэпсэфакIохэр ащ зэра­щэщтхэм яшъыпкъэу дэла— жьэх.