Республикэу Къырымрэ къалэу Севастопольрэ Урысые Федерацием къызыхэхьажьыгъэхэр непэ илъэси 8 мэхъу.

Ар хъугъэ-шIэгъэшхоу тари­хъым хэхьагъ ыкIи тикъэралыгъо щыпсэухэрэ цIыфхэмкIэ мэфэкI шъыпкъэ хъугъэ. Мыщ фэгъэ­хьыгъэ Iофтхьабзэхэр, концертхэр, зэхахьэхэр тикъэралыгъо ишъолъыр зэфэшъхьафхэм илъэс къэс ащэкIох. Ахэм зэу ащыщ Адыгэ Республикэри.

Илъэси 8-кIэ узэкIэIэбэжьмэ, Къырым щыкIогъэ референдумым зэфэхьысыжьэу фэхъугъэ­хэм къызэрагъэлъэгъуагъэмкIэ, зымакъэ зытынымкIэ фитыныгъэ зиIэ цIыфхэу хэдзыпIэ участкэ­хэм къякIолIагъэхэм япроцент 96,7-м ехъумэ Къырымрэ Севастопольрэ Урысыем хэхьа­жьынхэм дырагъэштагъ. УФ-м и Президентэу Владимир Путиныр зыкIэтхэгъэ унашъом ди­штэу ахэр Урысыем исубъектхэм ащыщ хъугъэх. США-м, Европейскэ Союзым хахьэхэрэ къэралыгъохэм ар мытэрэзэу алъытагъэми, Урысыем ыкIи Къырым ащыпсэухэрэ цIыфхэм къэралыгъом ипащэ ышIыгъэ унашъор игъо дэдэу алъытагъ ыкIи дырагъэштагъ. 2014-рэ илъэсым гъэтхапэм и 17-м Iэ­кIыб къэралыгъохэм ащыщыбэ­мэ Урысыем санкциехэр къытыралъхьагъэх.

Тарихъ мэхьанэшхо зиIэ хэ­дэныр цIыфхэм зашIыгъэр илъэ­си 8 хъугъэ, Къырымрэ къалэу Севастопольрэ ащыпсэухэрэр ащ рыкIэгъожьыхэрэп, ядэжь, яунэ къагъэзэжьыгъэу алъытэ. Тикъэралыгъо иэкономическэ, ифинанс, кредитнэ ыкIи правовой системэ шъолъыритIур ахэ­гъэгъозэнхэм фэшI УФ-м и Пра­вительствэ унэшъо гъэнэфагъэхэр ышIыгъэх. ЦIыфхэр социальнэу къэухъумэгъэнхэм, Урысыем щыпсэухэрэм фитыныгъэхэу яIэхэр ахэми аIэкIэлъынхэм анаIэ тырагъэтыгъ.

УФ-м и Президент субъекти­тIур къэралыгъом щыщ ышIы­жьыгъэх. Зыгорэхэм ар агу ри­мыхьын, дырамыгъэштэн алъэкIыщт, ау цIыф къызэрыкIо­хэм яеплъыкI ары мыщ дэжьым анахь шъхьаIэр, ушэтынэу зэха­щэхэрэм къызэрагъэлъагъорэмкIэ, ахэр зыми рыкIэгъожьы­хэрэп. Шъыпкъэ, мыщ щыпсэу­хэрэр илъэси 8-м къыкIоцI къи­ныгъуабэмэ яолIагъэх, Ук­ра­инэм ылъэныкъокIэ къикIхэу зашъохэрэ псыр, электричествэр, гъомылапхъэхэр, нэмыкI продукциехэр цIыфхэм къаIэкIагъэхьажьхэрэп. Ау а гумэкIыгъохэм Къырым щыпсэухэрэр къагъэщтагъэхэп, нахь лъэш ышIыгъэх. УФ-м и Президент а зэкIэри къыгурыIозэ, цIыфхэм ящыIэкIэ-псэукIэ нахьышIу хъуным, инфраструктурэр зэтегъэ­псыхьэгъэным фэIорышIэщт уна­шъохэр ышIыгъэх. Пшызэ шъолъырым къикIырэ электричествэр зэрыкIощт линиякIэхэр Къырым къыращэлIагъэх. Керченскэ лъэмыджыр ашIыгъ. Ащ Iофхэр къыгъэпсынкIагъэх, ащ ишIуагъэкIэ гумэкIыгъуабэ дэгъэзыжьыгъэ хъугъэ. Медици­нэм, гъэсэныгъэм, нэмыкI лъэ­ныкъохэми хэхъоныгъэхэр ашIын­хэм къэралыгъом ипащэхэм мэхьанэшхо раты. ЫпэкIэ ямыIэгъэ ны мылъкур, соци­альнэ тын зэфэшъхьафхэр къа­IэкIахьэхэ хъугъэ. Шъыпкъэ, Iоф­хэм язытет уигъэрэзэпэным джыри пэчыжь, Урысыем инэмыкI шъолъырхэм афэдэу Къы­рымрэ Севастопольрэ ащы­псэу­хэрэ цIыфхэр гумэкIыгъохэм яуалIэх, ащкIэ санкциехэм, эко­номикэ къиныгъохэм яегъэ­шхо къэкIо. Ау а зэкIэри къызэ­рэзэранэкIыщтым яцыхьэ телъ, фонд зэфэшъхьафхэм зэхащэрэ ушэтынхэм язэфэхьысыжьхэм ар къагъэлъагъо.

КIарэ Фатим.