Къэралыгъо Думэм бюджетымкIэ ыкIи хэбзэIахьхэмкIэ и Комитет хэтэу Хьасанэкъо Мурат Урысые политическэ партиеу «Единэ Россием» и Тхьаматэу Д. А. Медведевым иобщественнэ приемнэу Адыгэ Республикэм щыIэм пэIу­дзыгъэ шIыкIэм тетэу цIыфхэр щы­ригъэблэгъагъэх.

Республикэм имуниципальнэ образование заулэмэ ащыпсэухэрэм ащ зыкъыфагъэзагъ ыкIи къыкIагъэт­хъыгъ УФ-м и Президентэу В. В. Путиным, джащ фэдэу хэушъхьафыкIыгъэ дзэ операцием хэлажьэхэрэм зэрадырагъаштэрэр. Мы Iофтхьабзэм хэлэжьэгъэ хэдзакIохэм анахьэу къыхагъэщыгъэр Урысыер зыкIыныгъэм теубытагъэ зыхэлъ Iофтхьа­бзэхэм зэрафэхьазырыр неонациз­мэм гуригъэIон, ригъэлъэгъун зэрэфаер ары.

— Урысыем щыпсэухэрэм я Президент зэрэдырагъаштэрэм къикIырэр дзэ операциемкIэ унашъо зэраштагъэр зэрэтэрэзыр ары. Тхьамафэ къэс Президентым ирейтинг хэхъо, цIыфхэм дзэм цыхьэу фашIырэр про­цент 84-м нэсыгъ, — къыIуагъ депутатым.

Мыекъуапэ ипредпринимательхэм къаIэтыгъэ Iофыгъохэм зыкIэ ащыщ сырьем ыуасэ, лъэпсэ гъэнэфагъэ е ушъхьагъу горэ ащкIэ щымыIэу, зэрэхагъахъорэр. Депутатым а IофымкIэ къулыкъу гъэнэфагъэхэм зафигъэзагъ.

— Партием афидэщтэп цIыфхэм анахь ящыкIэгъэ товархэмрэ фэIо-фашIэхэмрэ ауасэ къаIэтыныр. Пред­принимательхэм янэепсыягъэ пае цIыфхэр чIыпIэ зэжъу иуцонхэу щы­тэп, — къыIуагъ кIэухым Хьаса­нэкъо Мурат.

Мы Iофтхьабзэм хэлэжьагъэхэм социальнэ-правовой ыкIи нэмыкI лъэныкъохэмкIэ зыгъэгумэкIыхэрэм депутатыр ащагъэгъозагъ, джэуапхэри ащ къыритыжьыгъэх.

Адыгэ Республикэм игъэцэкIэкIо хабзэ икъулыкъухэм гъусэныгъэ пытэ зэрадыряIэр къыхэщэу мы Iофтхьабзэр рекIокIыгъ.

Къандор Анзор. Къэралыгъо Думэм идепутат иIэпыIэгъу.