Къэрэщэе-Щэрджэсым инароднэ ЗэIукIэ иде­путатэу Къуныжъ Мухьамэд фэгъэхьыгъэ шIэжь зэнэкъокъу самбэмкIэ Щэрджэскъалэ щыкIуагъ.

Урысыем ишъолъырхэм къарыкIыгъэхэ бэнэкIуи 150-м нахьыбэ алырэгъум щызэнэкъокъугъ. ХагъэунэфыкIырэ чIыпIэхэр къыдэзыхыгъэхэр Урысыем иныбжьыкIэхэм якIэух зэнэкъокъоу Iоныгъо мазэм и 25 – 30-м Симферополь щыкIощтым хэлэжьэщтых.

Адыгэ Республикэм ихэшыпыкIыгъэ командэ хэтхэм Щэрджэс­къалэ медалитIу къыщахьыгъ. Анцокъо Амир, кг 64-рэ, апэрэ чIыпIэр, тренерыр Хьабэхъу Адам, Хьакъуй Инвер, кг 64-рэ, ятIонэрэ чIыпIэр къыдахыгъ, Адыгэ Республикэм изаслуженнэ тренерэу Гъомлэшк Алый А. Хьакъуим ипащ.

— Къуныжъ Мухьамэд спортышхом щыцIэрыIоу щытыгъ, — къытиIуагъ Адыгэ Республикэм самбэмкIэ испорт еджапIэ ­ипащэу, спортымкIэ дунэе класс зиIэ мастерэу Делэкъо Адамэ. — Дунаим изэнэкъокъу самбэмкIэ дышъэ медалыр къыщихьыгъагъ, Адыгеим иныбджэгъушIугъ. ГукIэгъу зыхэлъ цIыфышIоу щыIэныгъэм щашIэщтыгъ. ЗэрэныбжьыкIэу непи къытхэтэу тэлъытэ.