— Уахътэр псынкIэу макIоми, гукъэкIыжьхэр жъы хъухэ­рэп, — къытиIуагъ Мыекъуапэ икъэзэкъхэм яотдел ипащэу Александр Даниловым.

2014-рэ илъэсым «Къырым ­игъатх» зыфиIорэ Iофтхьабзэм Александр Даниловыр зэрэхэлэжьагъэм къытегущыIэзэ, зэгъэпшэнхэр ешIых.

— 2014-рэ илъэсым, мэзаем и 27-м чэщыр хэкIотагъэу тызэIукIагъ. ПэшIо­рыгъэшъэу зыдгъэхьазырыгъагъэп.

Пшы­зэ икъэзэкъыдзэ тыригъусэу нэ­бгыри 170-рэ тыхъущтыгъ. Бандеровскэ купхэм тапэуцунэу, Къырым щыпсэурэ ткъош къэзэкъхэм, унагъохэм, нэжъ­-Iужъхэм IэпыIэгъу тафэхъунэу тиму­радыгъ.

— Чэщыр сыд фэдагъа? ГумэкIы­хэрэр къышъухэтыгъэха?

— Къещхыщтыгъ, осыр къесэу ригъэжьэгъагъ. Ом изытет тигъэгумэкIыщтыгъэми, купым рэхьатныгъэ хэлъыгъ. Щынагъэхэп, зэкIэкIожьыгъэхэп.

Щытхъу къэтхьынэу тыкIогъагъэп. Пшъэрылъ хэхыгъэ тиIагъ. Севастополь тызынэсым тиIофхэр нахь щынэгъончъэ хъугъэх. Полицием икъулыкъушIэхэм таригъусэу рэхьатныгъэр къэтыухъумэщтыгъ. Украинэм идзэхэм гъогу ятымытыным тыпылъыгъ.

Александр Даниловым къызэриIотэ­жьырэмкIэ, гъэтхапэм и 16-м Къырым референдум зэрэщызэхащагъэм мэхьэнэ ин иIагъ. ЦIыфхэр яшIоигъоныгъэ тетэу зекIуагъэх, къэзэкъхэм, нэмыкIхэу ягушIуагъо адэзыгощыгъэхэм «тхьа­шъуегъэпсэу» къараIожьыгъ.

— Непэ Украинэм щырэхьатэп, — зэдэгущыIэгъур лъегъэкIуатэ Александр Даниловым. — ХэушъхьафыкIыгъэ дзэ операциер зыщыкIорэ шъолъырхэм цIыфхэр ащыхэмыкIодэнхэм фэшI хэбзэ шапхъэхэр зехьэгъэнхэ, мамыр щыIакIэр къэухъумэгъэн фае. ШIушIэ IэпыIэгъур Донбасс тапэкIи езытыщтхэм тащыщ.

Республикэ общественнэ движениеу «Адыгэ Хасэм» хэтхэм, нэмыкI общест­веннэ зэхахьэхэм А. Даниловыр аIу­кIагъ. Мамыр щыIакIэр зэкIэми апшъэ шIыгъэн фаеу елъытэ. Сахьидэкъо Нурбый.