Гъэтхапэм и 17-р — Адыгэ Республикэм ипарламентаризмэ и Маф
Адыгэ Республикэм и Къэралыгъо Совет — Хасэм идепутатхэу, Адыгэ Республикэм имуниципальнэ образованиехэм ялIыкIо къулыкъухэм ядепутатхэу лъытэныгъэ зыфэтшIыхэрэр!
Адыгэ Республикэм ипарламентаризмэ и Мафэрэ Адыгэ Республикэм икъэралыгъо хабзэ иапшъэрэ законихъухьэ къулыкъу зызэхащагъэм ия 30-рэ илъэсрэ афэшI тышъуфэгушIо!
Мы мафэм, 1992-рэ илъэсым гъэтхапэм и 17-м, Апшъэрэ Советым иа 1-рэ сессие иIофшIэн ригъэжьэгъагъ. Советскэ Социалистическэ Республикэу Адыгеир Адыгэ РеспубликэкIэ зэхъокIыжьыгъэным фэгъэхьыгъэ закон ащ щаштэгъагъ, Адыгэ Республикэм игерб, игимн ыкIи икъэралыгъо быракъ щаухэсыгъагъэх. Тиреспубликэ изичэзыу хэхъоныгъэ а хъугъэ-шIагъэр ублапIэ фэхъугъ.
Илъэс 30-м къыкIоцI апшъэрэ законихъухьэ къулыкъум дэгъоу Iоф зыщишIэгъэ уахътэм мэхьанэшхо зиIэ политическэ хъугъэ-шIагъэхэр бэу щыIагъэх, ахэм апкъ къикIыкIэ тиреспубликэ социальнэ ыкIи экономикэ зэхъокIыныгъэ инхэр фэхъугъэх. Адыгеир джыри нахь зэтегъэпсыхьагъэ хъуным, цIыфхэм ящыIакIэ зыкъыIэтыным, республикэм щыпсэурэ лъэпкъхэм якультурнэ-тарихъ кIэн къэухъумэгъэным правовой лъэпсэ пытэ яIэнымкIэ республикэм ипарламентариехэм Iофышхо агъэцэкIагъ.
Республикэ парламентым иIэгъэ зэIукIэгъуиблыми депутатхэм хэдзакIохэм апашъхьэкIэ пшъэдэкIыжь зэрахьырэр къагурыIозэ, Iофэу агъэцакIэрэм джыри нахь шIогъэ ин къегъэтыгъэным анаIэ тырагъэтызэ, республикэмкIэ анахь мэхьанэшхо зиIэ Iофыгъоу къэуцухэрэм язэшIохынкIэ шIуагъэ къэзыхьыщт амалхэр къыхахыхэзэ, цIыфхэм ящыIакIэ нахьышIу шIыгъэным тегъэпсыхьэгъэ законхэр аштэх.
Илъэс 30-м къыкIоцI IофшIэнымкIэ опытэу шъуиIэ хъугъэм, гъэцэкIэкIо хабзэм, чIыпIэ зыгъэIорышIэжьыным якъулыкъухэм гъусэныгъэ пытэ зэрадышъуиIэм яшIуагъэкIэ тиреспубликэ исоциальнэ-экономикэ хэхъоныгъэ лъыкIотэным пае хэбзэихъухьэ IофшIэныр тапэкIи дэгъоу зэрэжъугъэцэкIэщтым тицыхьэ телъ.
Ныбджэгъу лъапIэхэр, зэкIэми тышъуфэлъаIо псауныгъэ пытэ, щыIэкIэшIу шъуиIэнэу, Адыгеимрэ Урысыемрэ яфедэ зыхэлъ хэбзэихъухьан IофшIэнэу жъугъэцакIэрэм тапэкIи гъэхъагъэхэр щышъушIынхэу!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожный