Урысые къэралыгъошхом ылъапсэ чыжьэу макIо. Рес­пуб­ликэхэр, хэкухэр зыч-зыпчэгъоу зэготхэу илъэсыбэрэ ащ щызэдэпсэугъэх.

СССР-р зызэхэзым, зэкIэри шъхьафитэу псэухэу рагъэжьагъ. Сыд фэдэрэ къэралыгъуи, орэин орэцIыкIу, ищыIэкIэ-псэукIэ ежь зэрэфаеу ыгъэпсы, зэрэфаеу ыгъэзекIо, ыгъэлажьэ шIоигъу. Ащ емыкIу хэлъэп.

Сыда адэ непэрэ мафэм Украинэм фэмыгъотырэр? ЗицIыф зыукIыжьэу хэта щы­Iэр? Сэ сшIэрэп, згъэ­шIагъэм ащ фэдэ слъэ­гъугъэп. Мы дунэешхом къытехъорэр бэ. Ау ащ фэдизыр тефэ, тетыфэ мэлажьэ, мэпсэу, ищыIэныгъэ щегъашIэ. Хэт дунэешхом къытехъуагъэу щыIэ зышIомыигъор? Ау джыри ар къызгурымы­Iуагъэр бэ.

Украинэм нахь щы­IэкIэ-псэукIэ дэгъу къыугу­пшысынэу ыгу къэкIыгъ. Ащ итарихъ икIэрыкIэу кIитхыкIыжьынэу, ар имыкъоу, Хэгъэгу зэошхоу блэ­кIыгъэри итарихъи къы­ригъэубытэу нэмыкIэу ыгъэпсэу фежьагъ. Щыгъупшагъа зэошхоу 1941 —1945-рэ илъэсым щыIагъэм идзэкIолIхэр тэтиехэм аготхэу нэмыц техакIохэр зырафыжьхэм ыуж нэмыц укIакIохэм ягъусэхэу тэ къы­зэрэтэожьыгъэхэр? Ук­раинэм ицIыфхэр урыс шъып­къэу егъашIэм тлъы­тэу къэтхьыгъ. Джы непэ ащ ицIыф­хэр милитаризацием игъогу техьанхэшъ, ялъэпкъ езэожьынхэр хэт зышIагъэр?

Мы тхьамыкIагъом изэшIохын псынкIагъоу щытэп. Ау Президентэу Владимир Путиным унашъо ышIыгъ тидзэкIолIхэр цIыф­хэм афэсакъынхэу. Ащ Урысыем ис пстэуми дырагъэштагъ. ХэушъхьафыкIыгъэ дзэ операцием ипшъэрылъыр амал иIэ­мэ мамыр цIыфхэм иягъэ ямыкIыныр ары. Мы зэпэуцужьыр къезыгъэжьагъэр Урысыер арэп, илъэсий хъугъэу Украинэм идзэхэр мамыр цIыфхэм къяощтыгъэх. Ащ фэдэ тхьамыкIагъо къэмыхъужьыным пае неонацистхэр лъэ­псэкIодэу дунаим щыгъэкIодыгъэнхэ фае. Джары джы непэ зы­фэбанэхэрэр ти­ухъу­макIохэу Украинэм щыIэхэр.

Тэ, IофшIэным иветеранхэр, зэошхом икIэлэ­цIы­кIухэр, тыгу зыкIи джэнджэш къихьэрэп непэ Ук­раинэм тхьамыкIагъоу щыхъурэм кIэух тэрэз зэрэфэхъущтымкIэ. Украинэм ипащэхэм ар агу рихьырэп, ау тэ тэшIэ ащ фэдэ мэшIошхом игъэкIосакIэ. Шъугу къэжъугъэ­кIыжь ащ фэдэ мэшIошхоу нэмыц техакIохэм къыташIылIэгъагъэр. Шъугу шъумыгъэкIоды, тидзэ­кIолIхэр, мамырныгъэм игъогу шъукъытехьажьыщт!

Хъодэ Сэфэр. IофшIэным иветеран, заом икIэлэцIыкIу.