Адыгэкъалэ икIэлэцIыкIу тхылъеджапIэ модельнэ шIыкIэм тетэу Iоф ышIэным фэшI егъэжьэпIэшIухэр ышIыгъэх.

2021-рэ илъэсым ­лъэпкъ проектэу «Культу­рэм» къыдыхэлъытэгъэ зэнэ­къокъум текIоныгъэр къы­щыдихыгъ. ГъэцэкIэ­жьын, зэхэщэн Iофыгъохэр рагъэжьагъэх.

Адыгэ Республикэм культурэмкIэ иминистрэу Аулъэ Юрэ къыIуагъ тхылъ­еджапIэр модернизацие шIыгъэнымкIэ сомэ 5281200-рэ къызэрэфа­тIупщыгъэр. Ащ щыщэу сомэ млн 5-р федеральнэ бюджетым къыхахыгъ, рес­публикэм ибюджет къы­хахыгъэр сомэ 506000-рэ, муниципальнэ бюджет ахъ­щэр 230600-рэ мэхъу.

КIаугъоегъэ ахъщэмкIэ тхылъхэр, Iэмэ-псымэхэр, мебелыр ащэфынхэм джырэ уахътэ пылъых. Гъэцэ­кIэжьын IофшIэнхэр тхылъеджапIэм щэкIох.

— Лъэпкъ проектэу «Культурэм» ишIуагъэкIэ ятIонэрэ модельнэ тхылъеджапIэр къызэIутхыщт, — къыIуагъ Адыгэкъалэ иадминистрацие культу­рэм­кIэ и ГъэIорышIапIэ ипащэу НапцIэкъо Мариет. — КIэлэцIыкIухэм яшIэныгъэ хагъэхъонымкIэ, языгъэпсэфыгъо уахътэ нахь гъэшIэгъонэу агъэ­кIонымкIэ модельнэ тхылъеджапIэр гупчэ афэ­хъущт.

Адыгэкъалэ игупчэ тхылъеджэпIэ системэ модельнэ шIыкIэм техьагъэу Iоф ешIэ. «КIэлэцIыкIу тхылъеджапIэми шIэхэу зэхъокIыныгъэхэр фэ­хъущтых, — къытиIуагъ ащ щылэжьэрэ Хьахъукъо Ми­­рэ. — ЦIыф цIэрыIохэм, тхакIохэм, культурэм иIофышIэхэм, спорт­сменхэм, нэмыкIхэм та­IукIэщт».

Республикэм иятIонэрэ къалэу Адыгэкъалэ илъэс къэс зеушъомбгъу. Культурэм иIофшIапIэхэр зэты­рагъэпсыхьажьых, спорт псэуалъэхэр нахьыбэ мэ­хъух. КIэлэцIыкIухэм пIуныгъэ дэгъу ягъэгъоты­гъэ­нымкIэ къэлэ адми­нист­рацием иамалхэм ахэхъо.

Сахьидэкъо Нурбый.