Терроризмэм ыкIи экстремизмэм апэшIуекIогъэным фэ­гъэ­хьыгъэ Iофтхьабзэхэр гъэсэныгъэм иуч­реждениехэу республикэм итхэм ренэу ащызэхащэх.

2021-рэ илъэсым мы гумэкIыгъом ныбжьыкIэхэр щыухъумэгъэнхэм фэIорышIэрэ пIуныгъэ, культурнэ-гъэсэныгъэ Iоф­тхьабзэу мини 4,5-рэ зэ­ха­щагъ, ахэм кIэлэ­еджэкIо ыкIи студент мин 62-рэ ахэлэжьагъ.

Адыгэ къэралыгъо университетым иректорэу Мамый Даутэрэ Мыекъопэ къэралыгъо техноло­гическэ университетым иректорэу Къуижъ Саидэрэ къызэраIуагъэмкIэ, апшъэрэ еджапIэхэм кибердружинэхэр, клуб объединениехэр, щынэгъончъэным лъыплъэрэ студент отрядхэр яIэх.

Ащ нэмыкIэу, «Гъэсэныгъэм иорганизациехэм терроризмэм ыкIи экст­ремизмэм апэшIуекIорэ пэшIорыгъэшъ Iофтхьабзэ­хэр ащызэхэщэгъэнхэр» зыфиIорэ курсэу АРИПК-м зэхищагъэм кIэлэегъэджэ 38-рэ хэлэжьагъ, яшIэныгъэхэм ахагъэхъуагъ. КIэ­лэегъэджэ-психолог ыкIи ныбжьыкIэхэм Iоф адэ­шIэгъэным фытегъэпсы­хьэгъэ нэбгыри 100-м ехъу джырэблагъэ щыIэгъэ семинарым хэлэжьагъ.

НыбжьыкIэхэр гъогу пхэндж теуцонхэм щыу­хъумэгъэнхэм епхыгъэу АР-м и ЛIышъхьэ пшъэ­рылъ гъэнэфагъэхэр къыгъэуцугъэх.

— Мы лъэныкъомкIэ кIэ­лэегъаджэхэм яшIэныгъэхэм ахэгъэхъозэпытын, къулыкъушIэхэр ягъусэхэу Iоф зэдашIэн, зэрар къэзыхьын зылъэкIыщт купхэр пэшIорыгъэшъэу агъэна­фэхэзэ, мы лъэныкъомкIэ дэгъоу Iоф зышIэхэрэм щысэ атырахызэ япшъэ­рылъхэр агъэцэкIэнхэ фае. Депутатхэм, динлэжьхэм, общественникхэм, спорт­смен цIэрыIохэм шъу­къядж, тематическэ гущы­Iэгъухэр зэхашъущэх. ШъхьэкIафэ зыфашIырэ цIыфхэм ящы­Iэныгъэ гъогу, гъэхъагъэу ашIыгъэхэр къызафаIуа­тэкIэ, бэмэ щысэтехыпIэ афэхъущтых, — къыIуагъ КъумпIыл Мурат.