IэкIыб къэралыгъо щыпсэунэу фаер бэп
Щылэ мазэм и 25-м къыщегъэжьагъэу гъэтхапэм и 10-м нэс зыщыпсэунхэу нахь къыхахырэ къэралыгъом фэгъэхьыгъэу «SuperJob» зыфиIорэ сервисыр цIыфхэм яупчIыгъ.
Ащ зэфэхьысыжьэу фэхъугъэмкIэ, IэкIыб къэралхэм ащыпсэун амал яIэми, Мыекъуапэ дэсхэм япроцент 44-р Урысыем къинэжьыныр къыхахыгъ. IэкIыбым щыпсэухэрэм ящыIэкIэ-псэукIэ зышIогъэшIэгъонхэм япчъагъэ зэхапшIэу нахь макIэ хъугъэ. 2010-рэ илъэсым егъэпшагъэмэ, Урысыем къинэжьынэу фаехэр фэдитIукIэ нахьыбэ хъугъэ.
ЫпэкIэ къызэрэщытIуагъэу, Мыекъуапэ щыпсэухэрэм ащыщэу процент 44-р Урысыем къэнэщт. Илъэс 12-кIэ узэкIэIэбэжьмэ, ар процент 23-рэ зэрэхъущтыгъэр. США-м щыпсэунэу къыхэзыхыгъэр проценти 4, ар гъэрекIорэм елъытыгъэмэ, проценти 3-кIэ нахь макI. Проценти 3-р Швейцарием, Германием, Канадэ ащыпсэунхэу фаех. Грецием, Италием, Австралием, Норвегием, Финляндием ыкIи Швецием ащыпсэунхэу проценти 2-мэ къыхахыгъ. Великобританием, Израиль, Исландием, Мексикэм, Зэхэт Араб Эмиратхэм, Таиланд, Тыркуем, Францием ыкIи Чехием ащыпсэунэу фаехэр зы процент мэхъух.