Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм игъэцэкIэн къыдыхэлъытагъэу мы охътэ бла­гъэмкIэ пшъэрылъэу зыфагъэуцужьыхэрэм къатегущыIагъ гъогурыкIоныр щынэгъончъэнымкIэ Гупчэм ипащэу Аргун Даур.

Мы проектым къыдыхэлъытагъэу 2020 — 2024-рэ илъэс­хэм гъогурыкIоным ишапхъэхэр зыукъохэрэм якъыхэгъэщын фытегъэпсыхьэгъэ сурэт ыкIи видео тезыхырэ пкъыгъо 99-м нахь мымакIэу агъэуцущтых. Ащ дакIоу автотранспортым илъым ихьылъагъэ зыщащэчыщт ыкIи зыщауплъэкIущт чIыпIи 6 зэтырагъэпсыхьащтых. Ащ епхыгъэ зэзэгъыныгъэхэр адашIыгъэх, мы илъэсым ыкIэм нэс апэрэ пунктитIум яIофшIэн рагъэ­жьэщт.

Комплексхэр зыщагъэуцущтхэр Красногвардейскэ районыр ары, селоу Еленовскэм пэблагъэу, ащ фэдэ унашъо ышIыгъ шъолъыр проектнэ купым.

Апэрэ комплексыр респуб­ликэ мэхьанэ зиIэ автомобиль гъогоу «Красногвардейскэр — Улап — Заревэм», ятIонэрэр — «Белое — Дэгужъые» зыфиIорэм ия 10-рэ километрэ ащагъэпсыщтых.

Проектнэ IофшIэнхэр 2021-рэ илъэсым агъэцэкIагъэх, джащ фэдэу къэралыгъо экспертизэр акIугъ. Зы псэуалъэм ишIын зэкIэмкIи сомэ миллион 75,3-рэ тефэ. Ау гъогум телъ асфальтыр къызэрэзэтенэжьыщтыр къыдэплъытэмэ, проектым шIогъэшхо къызэритыщтым щэч хэлъэп.