Адыгеим и ЛIышъхьэу КъумпIыл Мурат Мые­къопэ районым зыщэIэм зэхэтэкъоным нэсыгъэ унэхэм къачIащыжьхэрэм апае ашIы­рэ унакIэхэм япхыгъэ IофшIэнхэр зэрэкIохэ­рэм зыщигъэгъозагъ.

Мы лъэхъаным псэупIэу Темирязевым уни 6 щашIы, ахэм квадрат метрэ мин 1,2-рэ фэдиз аубыты. Унэгъо 33-мэ фэтэрхэр аратынхэу рахъухьагъ. Унэхэм яшIын фэгъэзагъэр унэе предпринимателэу Комарцовыр ары.

Адыгеим и ЛIышъхьэ фирмэ-подрядчикым, АР-м псэолъэ­шIынымкIэ и Министерствэ, район администрацием ялIыкIо­хэм гущыIэгъу афэхъугъ, пшъэ­рылъ шъхьаIэу яIэхэри къыгъэ­нэфагъэх. Республикэм и ЛIы­шъхьэ къызэрэхигъэщыгъэмкIэ, гъогу картэкIэ зэджагъэхэм адиштэу IофшIэнхэр агъэцэ­кIэнхэу ыкIи пIалъэхэу аухэсыгъэхэм адэмыххэу ахэр зэшIуа­хынхэу щыт.

Мы лъэхъаным псэолъи 6-мэ япхыгъэ IофшIэнхэр аухыгъэх, уни 4-мэ коммуникациер аращэлIагъ, газым епхыгъэ документациер агъэхьазыры. Унэ кIоцIхэмкIэ IофшIэнхэри ыкIэм фэкIох.

КъумпIыл Мурат АР-м псэо­лъэ­шIынымкIэ и Министерствэрэ Мыекъопэ районым иадмини­страциерэ пшъэрылъ афи­шIыгъ документхэу ящыкIагъэхэр ­игъом аIэкIагъэхьанхэм анаIэ тырагъэ­тынэу. Джыри зы пшъэрылъ афишIыгъ унэхэм къапэIулъ чIы­пIэхэм язэтегъэ­псыхьанкIэ.

«УщыпсэунымкIэ Iэрыфэгъоу, гуIэтыпIэу щыт унэхэр цIыф­хэм аIэкIэдгъэхьанхэ фае. Мыщ дэ­жьым зыщыдгъэгъупшэ хъущтэп цIыфхэр къызэрэтщыгугъыхэрэр ыкIи унакIэхэм амал зэриIэкIэ нахь псынкIэу ачIэ­хьажьынхэу зэрэфаехэр. Федеральнэ гупчэр, ЖКХ-м ифонд IэпыIэгъушIу къытфэхъух ыкIи хэгъэгум и Пре­зидент къыгъэуцугъэ пшъэ­рылъхэр амал зэриIэкIэ нахь дэгъоу зэшIохыгъэ зэрэхъущтхэм тэри тынаIэ тед­гъэтын фае. ИлъэситIукIэ ыпэ титэу типшъэ­рылъ­хэр тэгъэца­кIэх.

Программэм иджырэ чэзыу дэгъоу зы­зэшIотхыкIэ, 2017-рэ илъэсым щылэ мазэм ыуж зэхэтэкъоным нэсыгъэкIэ алъы­тэгъэ унэхэм цIыфхэр къа­чIэтщыжьынхэ тлъэ­кIыщт. ДжырэкIэ IофшIэнхэм япсынкIагъэ къыкIедгъэч хъущтэп», — къы­Iуагъ Адыгэ Рес­публикэм и ЛIы­шъхьэ.

Мы илъэсым зэхэтэкъоным нэсыгъэ унэ квадрат метрэ ми­ни 4,9-м ачIэсхэр къачIищы­жьынхэ мурад Адыгеим иI.

А гухэлъхэм сомэ миллиони 180-м ехъу апэIуагъэхьащт.

2017-рэ илъэсым къыщыублагъэу 2021-рэ илъэсым нэс ащ фэдэ унэжъхэу агъэнэфагъэхэм цIыфхэр къачIащыжьыщтых, фэтэрыбэу зэхэт унэ 67-рэ ащ къыхеубытэ, квадрат метрэ мин 35-м ехъу пстэумкIи ахэм аубыты.

АР-м и ЛIышъхьэ ипресс-къулыкъу