Адыгеим и ЛIышъхьэу КъумпIыл Мурат къолъхьэ тын-Iыхыным пэуцужьы­гъэнымкIэ Адыгэ Республикэм и Комиссие изэхэсыгъоу тыгъуасэ щыIагъэм тхьамэтагъор щызэрихьагъ.

Зэхэсыгъом хэлэжьагъэх АР-м и Премьер-министрэ ипшъэрылъхэр зыгъэцакIэу КIэ­рэщэ Анзаур, Урысые Феде­рацием и Президент и Полномочнэ лIыкIоу ЮФО-м щыIэм иаппарат АР-мкIэ ифедеральнэ инспектор шъхьаIэу Сергей Дрокиныр, щынэгъончъэнымкIэ Федеральнэ къулыкъум АР-мкIэ и ГъэIорышIапIэ, АР-м ипрокуратурэ, АР-м и Апшъэрэ хьыкум, АР-м и МВД, федеральнэ, республикэ къулыкъухэм, ведомствэхэм, муниципалитетхэм япащэхэр.

Къолъхьэ тын-Iыхыным пэуцужьыгъэнымкIэ гъэрекIо Iофэу ашIагъэм икIэуххэм, къолъхьэ тын-IыхынымкIэ социологическэ ушэтынэу республикэм щызэхащагъэм икIэуххэм Iоф­тхьабзэм хэлэжьагъэхэр атегущыIагъэх.

АР-м и ЛIышъхьэ къолъхьэ тын-Iыхынымрэ нэмыкI хэбзэу­къоныгъэхэмрэ апэуцужьыгъэнымкIэ и ГъэIорышIапIэ ипащэу Алексей Селезневым зэхэсыгъом къызэрэщиIуагъэмкIэ, АР-м ишэпхъэ правовой актхэр федеральнэ хэбзэгъэуцугъэм ди­штэнхэмкIэ ведомствэм Iоф гъэнэфагъэхэр зэшIуехых. Шэп­хъэ правовой актхэм япроект 16-мэ ащыщэу 12-р аухэсыгъ. Къэралыгъо, муниципальнэ къу­лыкъушIэхэу хэбзэукъоныгъэхэр зышIыгъэхэм яхьылIэгъэ къэ­барыр прокуратурэм IэкIагъэ­хьагъ. Къолъхьэ тын-Iыхыным пэуцужьыгъэнымкIэ уплъэкIун 16 ГъэIорышIапIэм зэхищагъ, нэбгырэ заулэмэ лъэшэу афагъэпытагъ, нэбгырищ IэнатIэм IуагъэкIыгъ. Къэралыгъо хабзэм игъэцэкIэкIо къулыкъухэм Iоф зэрашIэрэмкIэ уплъэкIун 11 мыгъэ зэхащэнэу щыт.

Адыгэ Республикэм и Премьер-министрэ ипшъэрылъхэр зыгъэцакIэу КIэрэщэ Анзаур идоклад зыфэгъэхьыгъагъэр Адыгэ Республикэм гъэсэны­гъэмкIэ и Министерствэ къолъхьэ тын-Iыхыным пэуцужьы­гъэнымкIэ хэбзэгъэуцугъэр зэ­ригъэцакIэрэмкIэ АР-м ипрокурор тхылъэу къыгъэхьазыры­гъэм зэрэхэплъагъэхэр ары. Хэукъо­ныгъэу къыхагъэщыгъэхэр зэ­рэдагъэзыжьыгъэр, хэукъоныгъэ зышIыгъэхэм административнэ пшъэдэкIыжь зэрарагъэхьыгъэр ащ къыхигъэщыгъ.

Къэралыгъо муниципальнэ къулыкъушIэхэм декларацие Iофтхьабзэхэр зэрагъэцакIэрэм нахь пхъашэу гъунэ лъыфыгъэн фаеу Адыгеим и ЛIышъхьэ ылъытагъ.

«Министерствэхэм, ведомствэхэм, хабзэм имуниципальнэ къулыкъухэм кадрэхэмкIэ яспециалистхэм къулыкъушIэхэм хахъоу, мылъкоу яIэхэм яхьылIэгъэ декларациехэр игъом ыкIи икъоу къаугъоинхэр япшъэрылъ. Декларациехэр затын фэе пIа­лъэр аукъо зэрэмыхъущтым имызакъоу, къэбархэри икъоу аIэкIагъэхьан фае. Къолъхьэ тын-Iыхыным пэуцужьыгъэным фэгъэзэгъэ IофышIэхэм яIэпэIэ­сэныгъэ зыкъегъэIэтыгъэным мэхьанэ икъу етыгъэн фае», — къыIуагъ КъумпIыл Мурат.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм зэпхыныгъэ адыряIэнымкIэ ыкIи СМИ-мкIэ и Комитет итхьаматэу Шъхьэлэхъо Аскэр къолъхьэ тын-IыхынымкIэ социальнэ ушэтынэу зэхащэгъагъэм икIэуххэм къатегущыIагъ. Нэбгырэ 500-м ехъу ащ зэрэхэлэжьагъэр, къэ­ралыгъо фэIо-фашIэхэр агъэ- ца­кIэхэ зыхъукIэ, процент 15 фэ­­дизкIэ, бизнесым ылъэны­къокIэ процент 0,9-кIэ къолъхьэ тын-Iыхыным епхыгъэ хэбзэу­къоныгъэхэр ашIын зэралъэкIыщтым ищынагъо зэрэщыIэр ащ къыIуагъ. ГъэрекIо къэбар жъу­гъэм иамалхэм къолъхьэ тын­-Iыхыным епхыгъэ хэбзэукъоныгъэхэр амышIынхэм атегъэпсы­хьэгъэ материал 250-м ехъу къызэрэхаутыгъэр ащ хигъэунэфыкIыгъ.

Зэхэсыгъом чIыпIэ зыгъэIорышIэжьынымкIэ къулыкъухэм яIофышIэхэм къолъхьэ тын-Iы­хыным пэуцужьыгъэнымкIэ Iофэу ашIэрэми щытегущыIагъэх. Мыекъуапэ имэрэу Геннадий Митрофановымрэ Адыгэкъалэ имэрэу ЛIыхэсэ Махьмудрэ докладхэр ащкIэ къашIыгъэх.

АР-м и ЛIышъхьэ ипресс-къулыкъу