Адыгеим и ЛIышъхьэу КъумпIыл Мурат кри­зисым пэшIуекIощт амалхэр республикэм щыгъэфедэгъэнхэм мэхьанэшхо зэриIэр къы­Iуагъ республикэм имэкъумэщ предприятие шъхьаIэхэм япащэхэм заIокIэм.

УФ-м и Правительствэ экономикэм зыпкъитыныгъэ иIэным иплан зэхигъэуцуагъ, джырэ лъэхъаным Iофхэм язытет зы­фэдэ хъугъэм къыпкъырыкIыхэзэ, бизнес цIыкIумрэ гурытымрэ IэпыIэгъу афэхъугъэным ар фытегъэпсыхьагъ.

Хэгъэгум имэкъумэщ хъызмэт IэпыIэгъу зэрэфэхъущтхэ хэушъхьафыкIыгъэ Iофтхьабзэ­хэр агъэнэфагъэх. ФэгъэкIотэныгъэ зыхэлъ чIыфэхэм апае сомэ миллиард 25-рэ УФ-м и Правительствэ къыхигъэкIыщт.

КъумпIыл Мурат мэкъумэщ техникэмкIэ фэгъэкIотэныгъэ зыхэлъ лизингым фэгъэхьыгъэу къызэриIуагъэмкIэ, федеральнэ гупчэм ахъщэ тедзэу сомэ мил­лиард 12 къытIупщыщт. Мэ­къу­мэщ паркым игъэкIэжьын мылъкур пэIуагъэхьащт.

Ащ нэмыкIэу хьалыгъугъэ­жъэным фэгъэзэгъэ предприятиехэм сомэ миллиарди 2,5-рэ фэдиз IэпыIэгъоу аратыщт.

IофшIэныр езыгъэжьэгъэкIэ фермерхэм фэгъэкIотэныгъэ зыхэлъ чIыфэхэр, субсидиехэр ыкIи грантхэр ятыгъэнхэм анаIэ тырагъэтыщт. Мэкъу-мэщым ихэ­хъоныгъэ фытегъэпсыхьэгъэ къэ­ралыгъо программэхэр пхырыщыгъэнхэм, нэмыкI Iофтхьабзэхэу амалышIухэр къэзытыщтхэм ренэу анаIэ атырагъэтыщт.

«Тэ дэгъоу къыдгурэIо типред­принимательхэр зытещыныхьэ­хэрэр, санкциякIэхэм апкъ къи­кIэу ахэр зэуталIэхэрэм тащыгъуаз. Ау джыри зэ хэзгъэунэфыкIынэу сыфай экономикэмрэ бизнесымрэ зэрарэу ахьырэр амал зэриIэкIэ нахь макIэ шIыгъэным пае хэгъэгум и Правительствэ фэлъэкIыщтыр зэкIэ зэришIэрэр. Iофхэм язытет къыжъугурыIонышъ, IэпыIэгъу шъукъытфэхъуным тыщэгугъы», — къыIуагъ Адыгэ Респуб­ли­кэм и ЛIышъхьэу КъумпIыл Мурат.