Дзэм къулыкъур илъэсыбэрэ щызыхьыгъэ старшэ прапорщикэу Мырзэ Юныс исэнэхьат къытегущыIэныр икIэсагъ.

Зэгъэпшэнхэр ышIыхэзэ лъэпкъ шэн-хабзэхэр изэфэхьысыжьхэм къахигъэщыщтыгъ. Къулыкъур IэкIыб къэралхэм, Урысыем ишъолъырхэм ащи­хьыгъ. Мыекъопэ гарнизоным аужырэ илъэсхэр щигъэкIуагъэх. Лъэпкъ зэфэшъхьафхэм къулыкъур зэрадихьырэм лъэшэу рыгушхощтыгъ.

ДзэкIолI къызэрыкIоу ригъажьи, старшина хъугъэ, комендантскэ взводым икомандирэу агъэнэфагъ. Къулыкъур зыщихьыщтыгъэ частым икомандир ыкIи штабым ипащэ зыкIэтхэжьыгъэхэ тхы­лъым къыщеIо Ю. Мырзэр щысэтехыпIэу зэрэщытыгъэр.

Сержантхэр зыщагъэхьазырхэрэ еджа­пIэр «5-кIэ» къыухыгъ. Общественнэ пшъэрылъхэр дэгъоу ыгъэцакIэхэзэ, сержантхэр, дзэкIолI къызэрыкIохэр къыготхэу къулыкъур дэгъоу ыхьыщтыгъ. «Советскэ Армием иотличник» зыфиIорэ бгъэхэлъхьэ тамыгъэр, щытхъу тхылъхэр къыфагъэшъошагъэх. Щысэ зытырахырэ взводым пэщэныгъэ дызэрихьэзэ, боевой ыкIи политическэ ухьазырыныгъэу иIэмкIэ къулыкъушIэхэм къахэщыщтыгъ.

«Щытхъум итхылъ» зыфиIоу дзэм иIэм Мырзэ Юныс ыцIэ датхагъ.

Дзэм Юныс къызыхэкIыжьым, мамыр сэнэхьатхэм зафигъэзагъ. Адыгэ Рес­публикэм истадион шъхьаIэу «Зэкъошныгъэм» илъэсыбэрэ ипэщагъ. Правительствэр зычIэт унэми Iоф щишIагъ. — Стадионэу «Зэкъошныгъэм» пэщэныгъэ дызесхьэзэ спортым, культурэм гукIэ нахь сапэблагъэ сыхъугъ, — къы­Iуатэщтыгъ Мырзэ Юныс. — Спортымрэ культурэмрэ яшIуагъэкIэ Адыгеир дунаим нахь щызэлъашIагъ.

Израиль къикIыгъэх

Тилъэпкъэгъухэр зыщыпсэухэрэ хэгъэгоу Израиль футбол командэр къикIи, ныбджэгъу ешIэгъу Мыекъуапэ щыри­Iагъ. А лъэхъаным Адыгеим ифутбол щыцIэрыIо Натхъо Адам тренерэу Кфар-Камэ Iоф щишIэщтыгъ. Командэу ар зипащэм адыгэ кIалэх хэтыгъэхэр.

Мырзэ Юныс кIэщакIо фэхъуи, ешIэгъур рамыгъажьэзэ адыгэ орэдхэр стадионым щагъэжъынчыгъэх. Кфар-Камэ икомандэ щешIэхэрэм урысыбзэр зэрамышIэрэр Ю. Мырзэм къыдилъыти, стадионым дикторыр адыгабзэкIи къыщыгущыIэн фаеу ылъытагъ.

Урысыем ижурналистхэм я Союз хэтэу, спортымкIэ мастерэу, шIэныгъэлэжьэу Къуекъо Асфар стадионым идикторэу а мафэм хъугъэ. Адыгэбзэ зэгъэфагъэкIэ къэгущыIагъ, Кфар-Камэ иешIакIохэм алъэкъуацIэхэр адыгабзэкIэ стадионым зэрэщыIугъэхэр зэкIэми ягопагъ. Урысхэу, къэндзалхэу, нэмыкI­хэу ешIэгъум еплъыгъэхэм дикторыр бзи­тIукIэ къызэрэгущыIагъэр ягопагъ.

Мырзэ Юныс а мафэм гущыIэ фабэу фаIуагъэм тигъэгушхуагъ. Израиль къикIы­гъэ тилъэпкъэгъухэм ацIэкIэ Натхъо Адам зэIукIэгъум къыщыгущыIагъ, зэхэщакIохэм «тхьашъуегъэпсэу» къариIожьыгъ.

Ащ фэдэ хъугъэ-шIагъэхэр гум икIыжьхэрэп. ШIушIагъэр щыIэныгъэм хэкIуа­кIэрэп.

Мырзэ Юныс ныбджэгъоу иIагъэхэм урысхэр, адыгэхэр, нэмыкIхэри ахэтыгъэх. Анахьэу къахигъэщыщтыгъэмэ ащыщ Хьарахъу Шъэлихьэ. НэбгыритIури Щынджые щапIугъэх, щызэдеджагъэх, гуфэбэныгъэу зэфыряIэр щыIэныгъэм щыпхыращыгъ.

Хэгъэгум иухъумакIо и Мафэ, ТекIоныгъэм и Мафэ мэфэкIхэм зэкIэми къа­хигъэщынхэр Ю. Мырзэм шэнышIу фэ­хъугъагъ. Ятэу Сахьидэ Хэгъэгу зэошхом хэлэжьагъ, лIыгъэ зэрихьагъ. Щынджые фашистхэр тидзэкIолIхэм зэрэдафыжьыгъэхэм икъэбар нахьышIоу зэригъэшIэным пылъыгъ. НыбжьыкIэхэм япатриотическэ, интернациональнэ пIуны­гъэ хэлэжьэныр ипшъэрылъэу зыфилъы­тэжьыщтыгъ. Юныс­рэ ишъхьэгъусэрэ пхъуитIурэ зы шъаорэ зэдапIугъ. Ахэм адыгабзэри, урысыбзэри арагъэшIагъ. Ыкъоу Мурат икIэлэцIыкIугъом пщынаоу щытыгъ. Адыгэ орэдхэр къыригъаIохэзэ, пчыхьэзэхахьэм къекIо­лIагъэхэр ыгъэу­джыщтыгъэх. Игъонэмысэу Мырзэ Юныс дунаир зихъожьыгъэр илъэс пчъагъэ хъугъэ. Инэплъэгъу фабэкIэ, игукIэгъукIэ, игущыIэ щэрыохэмкIэ непи ар къытхэт.