Ижъырэ адыгэ къалэу Шъачэ ифилармоние лъэпкъ музыкальнэ Iэмэ-псымэхэмкIэ иоркестрэу «Русский сувенир» зыфиIоу П. И. Нечепоренкэм ыцIэ зыхьырэм иконцерт Мыекъуапэ щыкIуагъ.

Оркестрэр зызэхащагъэр илъэс 50 нахьыбэ хъугъэ. Iоф­шIэныр зырегъажьэм ансамблэу щытыгъ, музыканти 10 хэтыгъ. Лъэхъаным епхыгъэу зэхъокIыныгъэхэр фэхъугъэх. Джырэ уахътэ пщынаохэр, балалайкэмкIэ, домрэмкIэ, нэмыкIхэмкIэ мэкъамэхэр къезыгъаIохэрэм, орэдыIохэм япчъагъэ хэхъуагъ.

Оркестрэм ихудожественнэ пащэу, идирижер шхьаIэу Григорий Михайловыр Адыгеим имузыкальнэ искусствэ дэгъоу щашIэ. Адыгэ Республикэм изаслуженнэ артист, респуб­ликэм и Къэралыгъо премие къыфагъэшъошагъ, композитор, адыгэ лъэпкъ орэдышъохэр аранжировкэ ешIых, оркестрэм къыригъэIонхэм фегъэхьазырых.

Адыгэ Республикэм и Къэралыгъо филармоние щыкIогъэ концертэу «Черноморский аккорд» зыфиIорэм композитор цIэрыIохэу П. Чайковскэм, И. Дунаевскэм, Ж. Бизе, И. Брамс, фэшъхьафхэм япроизведениехэр щыIугъэх.

Ольга Коржовам урыс лъэпкъ орэдхэр къыIуагъэх. Анна Мягкаям домрэмкIэ, Андрей Венниковым балалайкэмкIэ орэдышъохэр къыхадзагъэх, оркес­трэм имузыкантхэм произведениехэр агъэжъынчыгъэх.

Лъэпкъхэм яорэдышъохэр

Къыблэм, Темыр Кавказым ащыпсэурэ лъэпкъхэм яфольклор къыхэхыгъэ орэдышъохэр, композиторхэм аусыгъэхэр «Русский сувенирым» ирепертуар хэтых. Цэй Любэ адыгэ мэкъамэхэр зыхэт произведениеу ыусыгъэр Мыекъуапэ щыкIогъэ концертым щызэхэтхыгъ. Адыгэ къашъоу «ЗэфакIор» искусствэм щызэлъашIэ. Орэдышъоу «ЗэфакIор» оркестрэм къызыхедзэм, филармонием щедэIухэрэр ыгъэгу­шIуагъэх. Бэрэ зэхахырэ орэдышъор псынкIэу къашIэжьыгъ, гум «щычэрэгъугъ».

Григорий Михайловым ифантазиеу къушъхьэу Фыщт илъэгапIэхэм афэгъэхьыгъэр концертыр къэзыгъэбаигъэхэм ащыщ.

Адыгеир гум икIырэп

— Мыекъуапэ, Адыгэ Республикэр сыгу икIыхэрэп, — къы­тиIуагъ оркестрэм ихудожественнэ пащэу Григорий Михайловым. — Эстраднэ-джазовэ едзыгъохэр, Пшызэ ыкIи Дон якъэзэкъхэм яорэдхэр, Къыблэм, Темыр Кавказым ащыпсэурэ лъэпкъхэм япроизведениехэр тирепертуар хэтых. Дунаим къыщырагъаIорэ мэкъамэхэр зэтэгъашIэх, тиконцертхэм ахэтэгъахьэх. Музыкэм лъэпкъхэр зэрэзэфищэхэрэр тизэхахьэхэм къащытэгъэлъагъо. Адыгэ музы­кэм тиоркестрэ чIыпIэшхо зэрэ­щыриIэр гъэзетеджэхэм къясIо сшIоигъу. Концертым еплъыгъэ­хэм, пчыхьэзэхахьэр зэхэзыщагъэхэм лъэшэу сафэраз.

Григорий Михайловыр Адыгеим иныбджэгъушIу. Ансамблэу «Отрадэм» ипащэу, Адыгэ Республикэм и Къэралыгъо филармоние исимфоническэ оркестрэ идирижерэу зэрэщытыгъэр искусствэр зышIогъэшIэ­гъонхэм ащыгъупшэрэп.

ЕплъыкIэхэр

— Къыблэ шъолъырым иоркестрэ анахь цIэрыIомэ ащыщэу «Русский сувенирым» Григорий Михайловыр ипащ, — игупшысэхэм тащегъэгъуазэ Урысыем, Абхъазым язаслуженнэ артисткэу, Адыгэ Республикэм инароднэ артисткэу Нэхэе Тэмарэ. — Григорий Михайловыр исэнэхьат хэшIыкIышхо фызиIэ музыкант, Iоф зэрэдэсшIагъэр IэшIу-IэшIоу сыгу илъ. Орэды­шъом псэ къыпигъакIэзэ тамэу ритырэр пкъынэ-лынэхэм къа­лъэIэсы, узыфещэ. ИIофшIагъэ хигъэхъонэу сыфэлъаIо, шIоу щыIэр къыдэхъунэу фэсэIо.

Къэралыгъом щыпсэурэ лъэпкъ­хэм яискусствэрэ якультурнэ кIэнрэ я Илъэсэу тызыхэтым джыри концерт гъэшIэгъон­хэр щытлъэгъущтых. Адыгеим автономие иIэ зыхъугъэр 2022-рэ илъэсым игъэкIотыгъэу хэд­гъэунэфыкIыщт.

НэкIубгъор зыгъэхьазырыгъэр ЕмтIылъ Нурбый.