Зэфэсым зыфагъэхьазыры
Республикэ общественнэ движениеу «Адыгэ Хасэм» и Хэсашъхьэ изэхахьэ лъэхъаным диштэрэ Iофыгъохэр къыщаIэтыгъэх.
Адыгэ Хасэм итхьаматэу ЛIымыщэкъо Рэмэзан къыIуагъ Адыгэ Хасэм и Устав зэхъокIыныгъэхэр фэшIыгъэнхэ зэрэфаер. Адыгэ Республикэм культурэмкIэ, гъэсэныгъэмрэ шIэныгъэмрэкIэ иминистерствэхэм, нэмыкI къулыкъушIэхэм уахътэм диштэу Адыгэ Хасэм Iоф зэрадишIэщтым ехьылIэгъэ унашъохэм зэхахьэм щытегущыIагъэх. Бзэм, тарихъым, культурэм яхьылIэгъэ тхылъхэм, журналхэм якъыдэгъэкIын Адыгэ Хасэр зэрахэлэжьэщт шIыкIэр къыщаIотагъ.
Адыгэ Хасэм икомитетхэм зэхъокIыныгъэхэр афашIынхэр игъоу алъытагъ. Адыгабзэм дэлэжьэщт комитетыр хэушъхьафыкIыгъэу щытыщт. Ащ фэшI тарихъымрэ археологиемрэ якомитет зэхэщэгъэн фае.
Комитетхэм ахэтыщтхэм, ахэр зезыщэщтхэм, хэбзэ къулыкъушIэхэм Iоф адашIэнымкIэ амалэу щыIэхэм атегущыIагъэх.
Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэIукIэм къыщиIуагъ кIэлэцIыкIу IыгъыпIэхэм лъэпкъ нэрылъэгъу IэпыIэгъухэр зэращагъэфедэхэрэм шIуагъэ къызэритырэр. Рагъэжьэгъэ Iофыр лъагъэкIотэн ямурад.
Гурыт еджапIэхэм ащыщхэм адыгэ кIэлэеджакIохэу ащеджэхэрэм адыгабзэр дэеу зэрашIэрэм ыгъэгумэкIэу Къуижъ Къэплъан къытегущыIагъ. Унагъомрэ кIэлэцIыкIу IыгъыпIэмрэ язэпхыныгъэхэм яхьылIэгъэ еплъыкIэхэр зэрагъэцэкIэщтхэм зэIукIэгъум щытегущыIагъэх.
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм ипэгъокIэу Адыгэ Хасэм зэхищэщт Iофтхьабзэхэм анахьэу къахагъэщыгъэр культурэм, тарихъым, спортым яхьылIагъэхэр арых. Бырсыр Батырбый, Болэкъо Аслъан, Нэгъуцу Аслъан, СтIашъу Юрэ, МэщфэшIу Нэдждэт, нэмыкIхэм къаIуагъ шIэныгъэлэжьхэр, хабзэм икъулыкъушIэхэр ягъусэхэу Iофхэр зэрэлъагъэкIотэщтхэр.
IэкIыб къэралхэм ащыпсэурэ тилъэпкъэгъухэм зэпхыныгъэу адыряIэр гъэпытэгъэным, гъэсэныгъэм, спортым, нэмыкIхэм къатегущыIагъэх Ацумыжъ Юсыф, Тхьапшъэкъо Альберт, Хьаблаукъо Адам, ГъукIэлI Сусанэ, НэпшIэкъуй Аминэ, ЦIыкIушъо Аслъан, фэшъхьафхэри.
Адыгэ Хасэм изимычэзыу зэфэс онлайн шIыкIэу 2020-рэ илъэсым, гъэтхапэм и 26-м зэхащэнэу рахъухьагъ. Зэхахьэм къыщаIэтыгъэ Iофыгъохэм яхьылIэгъэ унашъохэр аштагъэх.