Ермэлыкъи 150-м ехъу зэхащагъ
Адыгэ Республикэм и ЛIышъхьэу КъумпIыл Мурат пшъэрылъ зэрафишIыгъэм тетэу уасэхэм якъызэтеIэжэнкIэ Iофтхьэбзэ гъэнэфагъэхэр республикэм щызэрахьэх.
Мы илъэсыр къызихьагъэм щегъэжьагъэу ермэлыкъи 150-м ехъу Адыгеим щызэхащагъ. Бэдзэр уасэхэм анахьи нахь пыутэу ахэм гъомылапхъэхэр ащащэх. Уасэхэр къаIэты зэрэмыхъущтыр предпринимательхэм агурагъаIо.
Адыгэ Республикэм и ЛIышъхьэ пшъэрылъ къыгъэуцугъ муниципалитет пэпчъ ермэлыкъхэр цIыфхэм афызэхащэнхэу, уасэхэм зыкъамыIэтыным гъунэ лъафынэу, нахьыбэрэ ермэлыкъхэр Мыекъуапэ щыIэнхэу.
«Экономикэр чIыпIэ къин зыщит лъэхъаным Мыекъуапэ дэсхэм IэпыIэгъу афэхъугъэным тегъэпсыхьагъэу къэкIощт тхьамафэм къыщегъэжьагъэу шэмбэтми, тхьаумафэми ермэлыкъхэр зэхащэхэзэ ашIыщт. КъэлэдэсхэмкIэ ар Iэрыфэгъу хъущт, нахь пыутэу гъомылапхъэхэр къащэфын алъэкIыщт», — къыIуагъ къалэу Мыекъуапэ ипащэу Геннадий Митрофановым.