ЗэхэщакIохэм тафэраз
Республикэ общественнэ движениеу «Адыгэ Хасэм» диктантыр онлайн шIыкIэм тетэу щатхыгъ.
Къэралыгъо телерадиокомпаниеу «Адыгеим» ижурналистхэр, Адыгэ Хасэм хэтхэр адыгабзэмрэ тхыбзэмрэ я Мафэ фэгъэхьыгъэ диктантым итхын хэлэжьагъэх.
Журналистхэу Тэу Замирэ, ТIэшъу Светланэ, Беданыкъо Замирэ, ГъукIэлI Сусанэ диктантым итхын илъэс къэс зэрэхэлажьэхэрэр къытаIуагъ. Адыгэ Хасэм итхьаматэу ЛIымыщэкъо Рэмэ- зан, Хасэм хэтхэу МэщфэшIу Нэдждэт, Тэу Аслъан, Къуижъ Къэплъан, Чэтэо Ибрахьим, Едыдж Мэмэт, нэмыкIхэм адыгабзэм изэгъэшIэнкIэ ыкIи игъэфедэнкIэ диктантым мэхьанэшхо иIэу алъытэ.
— Адыгэ шэн-хабзэхэм, лъэпкъ шIэжьым, гум икъэбзагъэ афэгъэхьыгъэу Ожъ Аскэрбый ытхыгъэхэм къахахыгъэ диктантым купкI ин хэлъ, — игупшысэхэм тащегъэгъуазэ ЛIымыщэкъо Рэмэзан. — НыбжьыкIэхэм нахьышIоу адыгабзэр зэрагъэшIэным фэшI тапэкIи зэхахьэхэр зэхэтщэщтых. ЛIэужхэр зэфэзыщэрэ диктантым зедгъэушъомбгъущт.
ОсэшIхэм къаIощтым темыжэу тизэфэхьысыжьхэм къахэтэгъэщы тиадыгабзэ ибаиныгъэ нахьышIоу зэзыгъашIэ зышIоигъохэм диктантым шIуагъэ къызэрафихьырэр. ЗэхэщакIохэм тафэраз. Сахьидэкъо Нурбый.