Мы мафэхэм Адыгэ къэралыгъо университетым ия 7-рэ Кавказ хьисап олимпиадэ къыщызэIуахыгъ.

Мы илъэсым шъолъыр 20-мэ къарыкIыгъэ кIэлэеджэкIуи 150-рэ фэдиз ащ хэлажьэ. Урысыем, Болгарием, Азербайджан, Казахстан, Тыркуем, Армением, Монголием, Сербием, Таджикистан ыкIи нэмыкIхэм къарыкIыгъэхэр ащ къекIолIагъэх. Iофтхьабзэм къемыкIолIэшъугъэхэм онлайн шIыкIэм тетэу заушэтыщт.

АР-м гъэсэныгъэмрэ шIэныгъэмрэкIэ и Министерствэрэ Адыгэ къэралыгъо университетым и Кавказ хьисап гупчэрэ Iофтхьабзэм кIэщакIо фэхъугъэх. Олимпиадэм изэхэщэнкIэ АР-м иминистрэхэм я Кабинет, компаниеу «ITV Axxon Soft» зыфиIорэр IэпыIэгъу къафэхъугъэх.

Кавказ хьисап олимпиадэр апэрэу 2015-рэ илъэсыр ары зызэхащэгъагъэр. Iофтхьабзэр къызэIуихызэ АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевым къыхигъэщыгъ олимпи­адэм шIогъэ ин зэриIэр, хэлажьэхэрэм япчъагъэ илъэс къэс нахьыбэ зэрэхъурэр. Къэралыгъо зэфэшъхьафхэр ащ зэрепхых. ХьисапымкIэ сэнаущыгъэ ин зыхэлъхэр Адыгеим щаугъоинхэр, къэралыгъохэм азыфагу зэныбджэ­гъу­ныгъэ илъыныр пшъэрылъ шъхьаIэу зэрэщытыр къы­Iуагъ.

Iофтхьабзэр зэраублагъэр къыушыхьатэу, олимпиадэм итамыгъэ — шIэныгъэм епхыгъэ хьисап чъыгыр хагъэнагъ. КIэлэеджакIохэм хьисапымкIэ шIэныгъэу аIэкIэлъхэр мэфи 6-м къагъэлъэгъощтых, лекцие зэфэшъхьафхэм къафеджэщтых, ащ дакIоу республикэм ичIыпIэ зэфэ­шъхьаф­хэр арагъэлъэгъущтых, адыгэхэм яшэн-хабзэхэр, якультурэ къафаIотэщт.

Олимпиадэм иуцугъуитIу зэрифэшъуашэу кIуагъэ, кIэлэеджакIохэм дэгъоу Iоф ашIагъ. НыбжьыкIэхэм къы­зэраIуагъэмкIэ, IофшIэнхэр псынкIэхэп, ау гъэшIэгъоныгъэх. КIэлэеджакIохэм яшIэныгъэхэмкIэ зызэраушэты­гъэм дакIоу лъэпкъ къашъохэмкIэ Къэралыгъо академическэ ансамблэу «Налмэсым» иконцерт еплъыгъэх.

ДЕЛЭКЪО Анет.