Бжыхьасэхэм яшIушIэх
Гъатхэр къэсыгъ, чIыгури къэфабэ. Республикэм ичIыгулэжьхэри губгъо IофшIэнхэм афежьагъэх. ГъэрекIо апхъыгъэ бжыхьасэхэм яшIушIэх, гъэтхасэхэм япхъын зыфагъэхьазыры. АР-м мэкъу-мэщымкIэ и Министерствэ къызэритырэмкIэ, 2022-рэ илъэсым Iуахыжьынэу зэкIэмкIи бжыхьэсэ гектар мини 105-м ехъу апхъыгъ. Ащ щыщэу коцым гектар мин 84-м ехъу, хьэм гектар мин 11-м ехъу, рапсым гектар мини 10 арагъэубытыгъ.
Бжыхьасэхэм язытет специалистхэм ренэу ауплъэкIу. Ахэм къызэраIорэмкIэ, кIымафэр дэгъоу рахыгъ, непэрэ мафэм ехъулIэу уагъэрэзэнэу щыт. Цыгъохэм лэжьыгъэу къэкIыгъэр амыгъэкIодыным пае гектар 3445-мэ апэрэу щэнаутхэр ахалъхьагъэх, Адыгэкъалэ ичIыгулэжьхэм гектар 660-мэ ятIонэрэу ар ашIагъ.
ДжырэкIэ республикэм ичIыгулэжьхэм чIыгъэшIухэр бжыхьасэхэм аIэкIагъахьэх. Гъэтхапэм и 14-м ехъулIэу гектар мин 84-м кIахьэу яшIушIагъэх.
Гъэтхасэхэм япхъын республикэм ичIыгулэжьхэм пшъэрылъ шъхьаIэу яI. ПэшIорыгъэшъэу зэрагъэнэфагъэмкIэ, зэкIэмкIи гъэтхэсэ гектар 108106-рэ апхъын гухэлъ яI. Ащ щыщэу тыгъэгъазэм гектар 57728-рэ, натрыфым — 23915-рэ, зэнтхъым гектар 10790-рэ, картофым — 86,8-рэ, нэшэ–хъырбыдзхэм гектар 32-рэ, хэтэрыкIхэм гектар 295-рэ, былымIусхэм — 3449-рэ, Iэзэгъу уцхэр зыхашIыкIырэ уцхэм гектар 1252-рэ арагъэубытыщт. ДжырэкIэ зэнтхъ гектар 30 апхъыгъ.
Апхъыщт чылапхъэм ипроцент 80-м кIахьэу республикэм ичIыгулэжьхэм зэрагъэгъотыгъэх. Санкциеу тикъэралыгъо къытыралъхьагъэмэ яягъэ къэмыкIоным, IофшIэным зэпыу имыIэным дэлажьэх. Тихэгъэгу къыщыдагъэкIырэ чылапхъэхэр, химическэ обработкэ зэрашIырэ препаратхэр зэрагъэгъотых.
АР-м мэкъу-мэщымкIэ и Министерствэ бэмышIэу щыкIогъэ зэхэсыгъом Iофтхьабзэм гъэтхэ IофшIэнхэр республикэм зэрэщызэхащэхэрэр щызэхафыгъ. Джащ фэдэу Адыгеим ит мэкъумэщ хъызмэтшIапIэхэм къэралыгъо IэпыIэгъоу арагъэгъотырэм тегущыIагъэх.
ДЕЛЭКЪО Анет.